Biełaruska nie pavieryła internetu i paciahnułasia ŭ Krym
Žančyna pajechała na akupavany paŭvostraŭ ź Biełarusi na mašynie i ŭžo katory dzień nie moža zrazumieć, čamu ŭ kamientarach cełaja chvala chejtu. A što bienzin pa 5 dalaraŭ za litr, to nie strašna.
«Upeŭniena, što tam usio dobra»
Ludmiła Hłambockaja — markietołah i koŭč ź Minska. Paru dzion tamu jana vyrašyła pajechać u Krym.
«Pakul usie vakoł panikujuć i abmiarkoŭvajuć, ci varta ciapier naohuł jechać u Krym, my prosta zahruzili rečy ŭ mašynu», — raspaviadaje žančyna ŭ roliku ŭ instahramie.
Hetuju pajezdku jana nazyvaje vydatnym sposabam adklučyć uvieś źniešni šum, vydychnuć i skancentravacca na pracy.
«Pakul adny sumniajucca i čakajuć idealnaha momantu, my ŭžo z Natašaj (tak zavuć spadarožnicu błohierki. — NN) u darozie i ŭžo pracujem», — dadaje jana.
Nastupny rolik žančyna zapisała za 40 kiłamietraŭ ad Krymskaha mosta. Jana kaža, što nie vieryć tamu, što pišuć u internecie pra ciažkuju situacyju ŭ Krymie.
«I choć maje rodnyja i blizkija vielmi chvalujucca, ja ŭpeŭniena, što tam usio dobra».
Hetaje videa zalacieła na šyrokuju aŭdytoryju i nabrała kala 180 tysiač prahladaŭ. Aŭtarka roliku ŭ šoku ad kamientaroŭ (ich bolš za 500).
Adzin z kamientataraŭ napisaŭ nastupnaje: «Padobna, hetaja ciotka bolš vieryć televizaru. Bo Sałaŭjoŭ nie padmanvaje».
«Voś heta cikaŭnaść — prajechać 1500 kiłamietraŭ, kab daviedacca praŭdu», — iranizuje inšy.
U kamientach adhuknulisia i sami krymčanie: «U Krymie niama bienzinu, ja žyvu tut, i mnie niama sensu vam chłusić», «Čakajem nastupny dopis. My-ta, krymčanie, viedajem, jak u nas».
Taksama Ludmile paraili nie zabyć vykłaści rolik z praŭdaj ab tym, jak jana pierastała vieryć televizaru.
«Ja zaŭždy vieryła, što ŭsie ludzi chočuć mira i dabryni, ale čytajučy kamientary pad ryłs, nie tolki ad mužčyn, ale i žančyn, ja ŭ šoku», — adreahavała Ludmiła.
«Kali b nie hetyja kamientary i nie tryvožnyja roliki, jakija mnie panična skidvali blizkija, ja b naohuł nie zrazumieła, što tut jość pra što chvalavacca: u haradach absalutna zvyčajnaje žyćcio, znajści miesca dla parkoŭki — toj jašče kvest.
Usio zaniata, poŭna mašyn, ludzi hulajuć», — raskazvaje Ludmiła ŭžo z Kryma.
Litr bienzinu pa $5
Paśla Ludmiła ŭsio ž zakranaje temu z deficytam paliva.
«Tak, jość svaje asablivaści, naprykład, bienzin. Da [Krymskaha] mosta jaho poŭna, biez prablem, a voś dalej za mostam — deficyt.
Na miescy jaho pradajuć ledź nie pa 400 rubloŭ za litr (heta bolš za 14 biełaruskich rubloŭ, ci amal 5 dalaraŭ. — NN), na zvarotnym šlachu z Kryma — vielizarnaja čarha, i ja padazraju, što heta akurat tyja, chto zajmajecca pieraprodažam paliva», — prychodzić da vysnovy žančyna.
Ale ŭ astatnim joj usio padabajecca.
«A internet chaj zastajecca internetam. Davajcie być dabrejšymi adno da adnaho».
Kamientary