Jakaja drama ŭ Iranie! Śviatkavali vychad u płej-of, ale hoł admianili
Iran i Jehipiet zhulali ŭničyju 1:1. Jehipcianie naŭprost vyjšli ŭ 1/16 finału, a irancam daviadziecca spadziavacca, što atrymajecca prabicca tudy navat z tryma bałami i z treciaha miesca ŭ hrupie, piša sports.ru.
A jak było blizka, kab Iran pieramoh Jehipiet!
Na 90+ 2‑j chvilinie Miechdzi Taremi pry liku 1:1 zarabiŭ štrafny. Paśla padačy hałkipier adbiŭ miač pierad saboj, i Šadža Chaliłzade adrazu ž dabiŭ jaho ŭ sietku.
Chaliłzade, jaki, darečy, hulaje za iranski kłub z Tebryza pad nazvaj «Traktar», adrazu pabieh da vuhłavoha ściažka, prajechaŭsia na kaleniach i źniaŭ futbołku.
Za takoje aŭtamatyčna dajecca žoŭtaja kartka, ale jakaja sprava da žoŭtaj kartki, kali takaja radaść? Na Šadžu nakinulisia ŭsie — i hulcy na poli, i kamanda z łaŭki zapasnych. Usie padymali ruki ŭvierch.
Zaŭziatary taksama ŭ ekstazie. Hoł aščaśliviŭ uvieś Iran.
Chaliłzade abniaŭ litaralna kožnaha hulca. Treniery całavali jaho ŭ hałavu.
Śviatkavańnie doŭžyłasia bolš za chvilinu. Praŭda, paralelna jehipcianie padychodzili da sudździ Šymana Marčyniaka i na niešta jamu ŭkazvali.
A nieŭzabavie ŭmiašaŭsia VAR — i na 90+ 6‑j chvilinie hoł admianili z-za nievialikaha afsajdu.
Ciapier užo paradavaŭsia Jehipiet, a na tvarach hulcoŭ i zaŭziataraŭ Irana — rasčaravańnie.
Na 90+ 7‑j chvilinie irancy mahli znoŭ pierakulić emocyi na svaju karyść — Said Ezatałachi zamykaŭ ź blizkaj adlehłaści i trapiŭ u pierakładzinu.
Ale ŭsio ž taki ničyja — «pieramožnaja» dla Jehipta, jaki ŭpieršyniu ŭ historyi vyjšaŭ na ČS z hrupy.
Trenier Irana Amir Halejnaj paśla finalnaha śvistka sieŭ u kresła i spustošana hladzieŭ na pole.
Zastajecca maleńki šaniec, što Iran prabjecca ŭ płej-of z treciaha miesca, ale jon zusim mały.
Kamientary
"Ofsajd fiksirujetsia po priedpośledniemu ihroku, niezavisimo ot toho, vrataŕ eto ili polevoj"