Historyja z vysiečkaj dreŭ na polskaj častcy terytoryi Biełaviežskaj puščy nabiraje abaroty. Tak, siońnia Jeŭrapiejskaja kamisija (JEK) pačała praces suprać Polščy z-za płanaŭ vysiekčy drevy na svajoj terytoryi zapaviednika, pieradaje TASS sa spasyłkaj na pradstaŭnika JEK Enryka Bryvia.
JEK choča pravieryć, ci parušyła respublika zakanadaŭstva ES, kali pryniała rašeńnie pravieści sanitarnuju vysiečku lasnoha masiva na polskaj častcy puščy.
Pa słovach Bryvia, Biełaviežskaja pušča znachodzicca pad achovaj jak častka sietki Natura 2000. Jeŭrapiejski čynoŭnik skazaŭ, što JEK kantaktuje z polskim kiraŭnictvam, kab pierakanacca ŭ tym, što luboje «pryrodnaje» ŭmiašalnictva budzie prachodzić u adpaviednaści z normami Jeŭrapiejskaha sajuza.
Abvinavačvańni ŭ svoj adras Polšča ŭžo atrymała. U pryvatnaści, respublicy vystaŭlajucca parušeńni dyrektyŭ, jakija tyčacca abarony pryrodnych zon, fłory i fauny. U suviazi z hetym u Varšavu ŭžo nakiravanaje patrabavańnie z zaklikam vyklučyć lubyja padobnyja parušeńni. Heta tolki pieršy krok u raspačatym pracesie. Nastupnym etapam mohuć stać skarhi ŭ sud i štrafy, papiaredžvajuć u JEK.
Jeŭrakamisary raniej zapatrabavali, kab polskaje kiraŭnictva pradstaviła dakumienty pa situacyi vakoł Puščy. Adnak adkaz, atrymany z polskaha boku, nie zadavoliŭ brusielskich čynoŭnikaŭ.
Kamientary