Kitajcy vykupili kampaniju — raspracoŭščyka sacyjalnych kazino-hulniaŭ Playtika u Caesars Interactive Entertainment, daččynaj kampanii najbujniejšaha ŭ śviecie apieratara kazino Caesars Entertainment Corporation, paviedamlaje dev.by.
U kitajski kansorcyum uvajšli raspracoŭščyk hulniaŭ Shanghai Giant Network Technology Co, Giant Investment (HK) Limited, fond pramych inviestycyj zasnavalnika Alibaba Džeka Ma Yunfeng Capital, China Oceanwide Holdings Group Co, China Minsheng Trust Co, CDH China HF Holdings Company Limited i Hony Capital Fund.
Viadoma, što zasnavanaja ŭ Izraili kampanija sa štab-kvateraj u Hierclii zachavaje niezaležnaść u miežach kansorcyuma.
U 2010 hodzie izrailcianie Robiert Antakol i Ury Šachak zasnavali hiejmdeŭ-kampaniju Playtika i vypuścili svoj debiutny pradukt — hulniu Slotomania, jakaja ŭžo stała kłasikaj. Pry hetym praces pošuku pieršaha inviestara zaniaŭ u ich doŭhija vosiem miesiacaŭ. Nichto prosta nie moh pavieryć, što ludzi buduć hulać u anłajn-kazino, dzie jany nie zmohuć vyjhrać realnyja hrošy.
Za minułyja piać hadoŭ Slotomania stała samaj papularnaj słot-hulnioj u śviecie, a Playtika, nabytaja ŭ 2011 hodzie kampanijaj Caesars Interactive Entertainment za 130 młn dalaraŭ, stała suśvietnym raspracoŭščykam № 1 u śfiery sacyjalnych kazino z ofisami ŭ 12 krainach i štatam u 1300 čałaviek.
Minski ofis kampanii vyras za čatyry hady z 40 da 140 čałaviek. Biełaruskaja kamanda raspracoŭščykaŭ adkazvaje za vyrašeńnie mnohich krosprajektnych zadač. Naprykład, biełarusy raspracavali i padtrymlivajuć ułasny hulniavy ruchavičok Monosyne, na jakim pabudavana mnostva prajektaŭ Playtika.
Prodaž Playtika musiać uchvalić nahladnyja orhany i, jak čakajecca, budzie zavieršany ŭ trecim abo čaćviortym kvartale 2016 hoda.
Kamientary