Šakaładnyja plitki, cukierki i nabory bresckaj marki «Ideał» chutka, imavierna, źniknuć z handlu, a fabryka zakryjecca. U ekanamičnym sudzie Bresckaj vobłaści pačałasia pracedura likvidacyi «Pieršaj šakaładnaj kampanii». Ci aznačaje heta, što vytvorčy kompleks u zonie SEZ «Brest» u Kacinym Bary z sučasnym ofisam budzie ŭ chutkim časie pieraprafilavany, a lubimaja mnohimi handlovaja marka sydzie ŭ niabyt?
Pastupova stała źnikać z pryłaŭkaŭ mahazinaŭ pradukcyja z handlovaj markaj «Ideał». U apošni čas pradpryjemstva pracavała ź pierabojami, rabotnikaŭ časta adpraŭlali ŭ vymušanyja adpačynki. STAA «Pieršaja šakaładnaja kampanija» viała pieramovy z patencyjalnymi inviestarami, ale pieramovy nie ŭviančalisia pośpiecham. I 23 maja hetaha hoda ŭ ekanamičny sud Bresckaj vobłaści pastupiła zajava ab pryznańni pradpryjemstva bankrutam. Sprava była pryznačana da razhladu na 29 červienia. Ale za hety čas ŭłaśniki pieradumali i vyrašyli pajści pa šlachu likvidacyi pradpryjemstva.
«Kali b ŭłaśnikami prymałasia rašeńnie ab likvidacyi pa zvyčajnaj pracedury — z uviadzieńniem abaronnaha pieryjadu, — raspaviadaje namieśnik staršyni ekanamičnaha suda Bresckaj vobłaści Nina Dziarkač, — to ŭ pradpryjemstva byŭ by šaniec prajści praz praceduru sanacyi, to bok pracavać i, mahčyma, adnavić svaju płaciežazdolnaść. U hetym ža vypadku ŭ adnosinach da daŭžnika moža być pryniata tolki rašeńnie ab likvidacyi. Značyć, treba zvalniać pracaŭnikoŭ, pakinuŭšy tolki tych, jakija buduć zajmacca praceduraj likvidacyi. Ale kali ŭ pracedury likvidacyi budzie vyjaŭlena, što ŭ pradpryjemstva dastatkova majomaści, kab raźličycca z abaviazkami, sud spyniaje vytvorčaść pa spravie ab bankructvie i addaje jaho na mierkavańnie ułaśnikaŭ: albo praciahvajcie likvidacyju, albo admianiajcie i pracujcie dalej».
U «Pieršaj šakaładnaj kampanii» roźnica pamiž abaviazkami i koštam majomaści nie nastolki vialikaja: 39 młrd rub. daŭhoŭ u «starych» hrošach i 34 młrd rub. — košt majomaści. Jaje los palahčaje i toje, što asnoŭnaja suma (kala 26 młrd. rub) — heta daŭhi pierad bankam. Ale kredyty ŭ ich u asnoŭnym u biełaruskich rublach, to bok jany nie buduć krytyčna raści za košt kursavych roźnic. A z adkryćciom konkursnaha viadzieńnia suma budzie zafiksavanaja na hetuju datu i nie stanie raści, jak śniežny kom.
«Pieršaja šakaładnaja kampanija» była zarehistravanaja ŭ SEZ «Brest» ŭ 1997 hodzie pad «ščaślivym» numaram 7. Spačatku pradpryjemstva nazyvałasia «Biełaruskaja kavavaja kampanija». Svaju ciapierašniuju nazvu jano atrymała ŭ 2005 hodzie. Pieršaja pradukcyja była vypuščana ŭ krasaviku 1998 hoda. Heta było ŭsiaho try vidy stahramovaha plitkavaha šakaładu. U dalejšym asartymient pašyraŭsia za košt roznych hatunkaŭ šakaładu z dadańniem arechaŭ i cukataŭ, šakaładnych cukierak (vahavych i rasfasavanych u pakunki). U 2006 hodzie asartymient cukierak składaŭ 29 najmieńniaŭ. U 2000 hodzie adbylisia pieršyja ekspartnyja pastaŭki pradukcyi. Fabryka brała pryzy na prestyžnych vystavach, kirmašach i dehustacyjnych konkursach u krainie i za miažoj, u tym liku nieadnarazova atrymlivała Hran-pry.
Pa jakim mienavita varyjancie buduć raźvivacca padziei, siońnia skazać ciažka. Nie vyklučajecca, što pradpryjemstva moža być reanimavana i praciahnie funkcyjanavać.
Situacyja vyznačycca, kali na šali buduć pakładzieny, z adnaho boku, patrabavańni kredytoraŭ i, z druhoha — košt majomaści. Kali ŭsio ž budzie pryniata rašeńnie ab likvidacyi i majomaści akažacca niedastatkova, kab raźličycca pa daŭhach, to roźnica moža być spahnana z zasnavalnikaŭ pradpryjemstva (ich troje).
«Jość dźvie padstavy dla pryciahnieńnia ŭdzielnikaŭ da subsidyjarnaj (tak zvanaj dadatkovaj) adkaznaści, — kaža Nina Dziarkač. Pieršaje — heta daviadzieńnie pradpryjemstva da bankructva svaimi rašeńniami. I druhoje — niesvoječasova pryniataje rašeńnie ab bankructvie. Z momantu, kali jany daviedalisia, što daŭhoŭ u ich bolš, čym majomaści, zakonam dajecca miesiac dla padačy zajavy ab bankructvie pradpryjemstva».
Najlepšy varyjant dla kredytoraŭ — prodaž pradpryjemstva ŭ pracedury bankructva jak adzinaha majomasnaha kompleksu. Kali znojdziecca pakupnik, jaki kupić z tarhoŭ ŭsiu šakaładnuju fabryku, «čystuju», biez daŭhoŭ, z abstalavańniem i handlovaj markaj, — vydatna. Takoje raźvićcio padziej zadavoliła b i łasunoŭ, jakija paśpieli palubić pradukcyju z handlovaj marki «Ideał».
…A ŭ 2017 hodzie «Pieršaj šakaładnaj kampanii» spoŭniłasia b 20 hadoŭ. Zaraz na pradpryjemstvie z kolkaściu štatnych supracoŭnikaŭ kala 40 čałaviek, linija pa vytvorčaści kandytarki nie pracuje.
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary