Rasii vyhadna, kab u Biełarusi byli narmalnyja adnosiny z zachodnimi partniorami, zajaviŭ žurnalistam 5 vieraśnia ministr zamiežnych spraŭ Biełarusi Uładzimir Makiej, kamientujučy zajavy, jakija hučać u mižnarodnaj presie, pra toje, što zaciahnutyja pieramovy z Rasijaj ab pastaŭkach nafty i ab canie na haz źjaŭlajucca adkazam na narmalizacyju adnosin Biełarusi z Zachadam.
«Pytańni narmalizacyi stasunkaŭ Biełarusi ź Jeŭrapiejskim sajuzam, ź inšymi zachodnimi partniorami ŭžo nahnali askomu. Na hetuju temu ŭžo šmat razoŭ vykazvaŭsia kiraŭnik biełaruskaj dziaržavy, niama sensu paŭtaracca. My nie źbirajemsia razryvać suviazi z našymi tradycyjnymi partniorami, ale adnačasova situacyja takaja, što dla Biełarusi žyćciova nieabchodna mieć narmalnyja adnosiny ź Jeŭrapiejskim sajuzam, sa Złučanymi Štatami Amieryki, ź inšymi klučavymi hulcami ŭ roznych rehijonach», — zajaviŭ ministr.
Makiej ličyć, što niama nieabchodnaści źviazvać ekanamičnyja pytańni va ŭzajemaadnosinach z Rasijaj sa źniešniepalityčnymi. «Nie dumaju, što heta linija aficyjnaj Maskvy. My abmiarkoŭvali hetuju temu z maim kaleham Siarhiejem Łaŭrovym. Jon dakładna, adnaznačna skazaŭ, što Rasija zacikaŭlenaja ŭ tym, kab u Biełarusi byli narmalnyja adnosiny z zachodnimi krainami. I, darečy, što niepasredna da Rasii, to ŭ Rasii i mnohich inšych našych sajuźnikaŭ na postsavieckaj prastory našmat bolš prasunutyja adnosiny ź ES i ZŠA», — dadaŭ kiraŭnik MZS.
Ministr padkreśliŭ, što na niadaŭniaj sustrečy kiraŭnikoŭ MZS krain — členaŭ ES i krain — udzielnic Uschodniaha partniorstva biełaruskaja delehacyja była adzinaj, jakaja ŭźniała pytańnie ab nieabchodnaści i vyhadnaści raźvićcia ŭzajemadziejańnia pamiž ES i Jeŭrazijskim ekanamičnym sajuzam. «My zaŭsiody takuju liniju prasoŭvali, i my majem namier i nadalej rabić usio, kab hetaja ŭzajemasuviaź raźvivałasia, macnieła. Bolš za toje, ja dumaju, što i dla Rasii, asabliva ŭ ciapierašni pieryjad najaŭnaści niejkich prablem u adnosinach ź Jeŭrapiejskim sajuzam, taksama vyhadna, kab u Biełarusi byli narmalnyja adnosiny ź Jeŭropaj, z ZŠA, tamu što ŭ miežach niedastatkovaha, skažam tak, dyjałohu źjaŭlajecca dadatkovy kanał dla taho, kab my niejkija rečy danosili da našych jeŭrapiejskich partnioraŭ», — ličyć Makiej.
Zakranajučy temu niepasredna pieramoŭ z RF pa hazie i nafcie, jon padkreśliŭ, što heta sprečka pamiž subjektami haspadarańnia. «Biełaruś zaŭsiody vykonvała i budzie vykonvać tyja abaviazacielstvy, jakija my ŭziali na siabie ŭ miežach našaha členstva ŭ roznych intehracyjnych strukturach. I my nikoli nie budziem rabić niejkich krokaŭ, jakija b išli nasupierak hetym abaviazacielstvam», — skazaŭ kiraŭnik źniešniepalityčnaha viedamstva.
Nahadajem, hazavaja sprečka pamiž Biełaruśsiu i Rasijaj doŭžycca bolš za paŭhoda. Minsk nastojvaje na źnižeńni koštu rasijskaha hazu, Rasija z hetym nie zhodnaja i abvinavačvaje biełaruski bok u parušeńni kantrakta. Dla stymulavańnia pahašeńnia doŭhu Maskva ŭ trecim kvartale skaraciła pastaŭki nafty na biełaruskija NPZ. U červieni vice-premjer RF Arkadź Dvarkovič zajaviŭ, što da skaračeńnia pastavak pryviała niedapłata biełaruskaha boku za pastaŭleny pryrodny haz.
Kamientary