«Materyjały ŭžo pieradali ŭ sud. A sam jon nabraŭ 10 kiłahramaŭ» — baćki i advakat Uładzimira Kondrusia raspaviali pra jaho siońniašni stan

Advakat Kondrusia Vadzim Mušynski i maci Halina Vasiljeŭna raskazali, što Uładzimir pakul jašče znachodzicca ŭ balnicy. Ale śledstva ŭžo skončyłasia, i materyjały jaho spravy nakiravanyja ŭ sud.

Pavialičyć

Padrabiaznaści samoj spravy Mušynski kamientavać nie moža — jon davaŭ padpisku ab nierazhałošvańni. Ale ž pra toje, jak siabie adčuvaje sam Kondruś, advakat trochi raspavioŭ.

«Apošni raz ja bačyŭ Uładzimira tydni z try tamu — naprykancy vieraśnia. Jon byŭ pad vartaj — u minskim SIZA na Vaładarcy. Kondruś jašče prachodziŭ niejkuju tam reabilitacyju, byŭ u sančastcy, ale jon užo nabraŭ vahu trochi, užo sam chadziŭ, narmalna razmaŭlaŭ. Usio ŭ paradku było. Nakolki mnie viadoma, anijakich zvyšžorstkich nastupstvaŭ haładoŭka nie dała… Va ŭsiakim vypadku, jon mnie ničoha pra takoje nie kazaŭ», — raspavioŭ «Našaj Nivie» Vadzim Mušynski.

Baćki Kondrusia vielmi chacieli, kab syna adpuścili damoŭ pad padpisku. Ale ž, kaža advakat, takoje chadajnictva jany z Kondrusiem pakul nie zajaŭlali.

«Moža, pasprabujem u sudzie… Pakul nie viedaju. Baćki Uładzimira zajaŭlali takoje chadatajnictva, ale ž nichto jaho nie zadavoliŭ, uličvajučy ciažkaść złačynstva, u jakim abvinavačvajuć ich syna, — skazaŭ Mušynski. — Sam Kondruś padčas našych sustreč byŭ spakojny. Jon hatovy da ŭsiaho. Dumaju, jon viedaje praktyku padobnych spraŭ i ŭjaŭlaje, čym heta moža skončycca».

Śledstva pa spravie ŭžo skončyłasia. Materyjały pieradali ŭ sud.

«Čym skončycca sud, ja prahnazavać nie budu. Moža być usio, što zaŭhodna», — skazaŭ Vadzim Mušynski.

Baćki Uładzimira bačyli syna tolki adzin raz — kali jon byŭ jašče ŭ vielmi ciažkim stanie.

«Paśla jany niekalki razoŭ pisali zajavy, prasili spatkańnia, i ja prasiŭ u śledstva, kab im dazvolili… Ale nam i nie adkazvali «nie», i nie adkazvali «tak» — maŭlaŭ, chaj baćki pišuć zajavy, my budziem razhladać… A kali zajavy pisalisia, to ŭžo adkazvali, što materyjały pieradajucca ŭ sud, źviartajciesia tudy, ci ŭ prakuraturu… Praściej kažučy, spatkańnie nichto nie daŭ», — raspavioŭ Mušynski.

Ale ž baćki Uładzimira abmieńvajucca z synam listami.

«Tak, spatkańnia nam nie dali… Ale ž listy pišam. Uładzimir jeść narmalna, nabiraje vahu niabłaha… Pisaŭ, što nabraŭ 10 kiłahramaŭ, — raskazała maci Halina Vasiljeŭna. — Ale dakładna nie viedaju, my ž nie bačyli jaho. Da taho ž, piša, tam ź piečańniu peŭnyja prablemy zastalisia paśla haładoŭki… Ale ŭ cełym, piša, usio narmalna».

Na siońniašni dzień Uładzimir znachodzicca ŭ respublikanskaj turemnaj balnicy, što na Vaładarcy, paviedamiła maci Uładzimira.

«Tydzień tamu jon jašče lažaŭ u balnicy. My tady jeździli pieradavali pieradaču. Jon užo ich biare, nie admaŭlajecca, — skazała Halina Vasiljeŭna. — Dazvolena pieradavać 30 kiłahramaŭ na miesiac, voś my i vozim jamu čas ad času. Ale syna jašče nie bačyli. Pabačymsia ŭžo tolki na sudzie».

 ***

Nahadajem, što žychar pasiołka Rudziensk Uładzimir Kondruś 1977 hoda naradžeńnia byŭ uziaty pad vartu 14 červienia ŭ miežach papiaredniaha rasśledavańnia za jaho mierkavany ŭdzieł u padziejach kala Doma ŭrada padčas vybaraŭ prezidenta ŭ 2010 hodzie. Jon abvinavačvajecca pa artykule 293 Kryminalnaha kodeksa «Masavyja biesparadki», pa jakim u 2011 hodzie było asudžana 49 čałaviek, mnohija z pazbaŭleńniem voli na roznyja terminy. Na čas śledstva jon utrymlivajecca ŭ SIZA №1 h. Minska.

Baćki, siastra i advakat Uładzimira nie mohuć raspavieści ŚMI padrabiaznaści spravy — jany dali padpisku ab nierazhałošvańni.

Sam Uładzimir amal dva miesiacy admaŭlaŭsia ad ježy, paśla čaho stan jaho zdaroŭja mocna pahoršyŭsia: jon nie moh navat samastojna chadzić.

Baćki Uładzimira Kondrusia saromiejucca prasić ab finansavaj dapamozie, ale apłočvać advakata piensijanieram nieprosta. Kali chtości zachoča dapamahčy Kondrusiam — kantakty baćkoŭ jość u Redakcyi «Našaj Nivy» ([email protected]).

• 0
• 0
• 0
• 0
• 0
• 0
• 0
• 0