Palityki davierylisia prostym słovam krain-harantaŭ i nie daviali spravu da pahadnieńnia.
Ukraina nie moža raźličvać na dapamohu ad krain-harantaŭ jaje biaśpieki zhodna z Budapiešckaj damovaj, tamu što jaje nie zrabili pahadnieńniem, jakoje było b padmacavana zakanadaŭstvam ZŠA i Vialikabrytanii. Zrešty, jak i Biełaruś.
Pra heta raspavioŭ u intervju vydańniu «Hardon» pieršy kiraŭnik niezaležnaj Biełarusi Stanisłaŭ Šuškievič.
Pavodle jaho słoŭ, heta byli nie pahadnieńni, a miemarandum — pratakoł ab namierach pa abaronie Ukrainy ŭ vypadku ŭtylizacyi jadziernaj zbroi.
«Nijakich Budapiešckich pahadnieńniaŭ nie było. Byŭ miemarandum, dekłaracyja. Heta roznyja rečy: dekłaravać i zaklučyć damovu. Naprykład, pahadnieńnie ab stvareńni SND. Jano padpisana i ratyfikavana dziaržavami. A tut było vykazana mierkavańnie kiraŭnikoŭ, što harantami cełasnaści Ukrainy źjaŭlajucca takija i takija krainy. Ale nichto hetaha nie pravodziŭ praz zakanadaŭstva Brytanii ci Złučanych Štataŭ. Tamu heta pratakoł ab namierach», — skazaŭ Šuškievič.
Jon taksama zajaŭlaje, što nie pravilna kazać, što byli parušanyja Budapiešckija pahadnieńni, bo ich nie było.
«Byŭ miemarandum, zajava. A toje, što jaho nie daviali da pahadnieńnia, — heta pralik davierlivych ludziej. Tamu što heta rabiłasia pa-saviecku. Dakładna hetak ža, jak było z rašeńniami, jakija prymali na samitach SND. Tam była proćma dobrych rašeńniaŭ. Ale hetyja rašeńni, budučy nie praviedzienymi praz nacyjanalnyja zakanadaŭstvy, nie ratyfikavanyja parłamientami, zastalisia pratakołam ab namierach. Heta zusim nie toje, što pastanovy CK KPSS i Saŭmina. Tam treba było vykonvać punkty. A tut byli vykazany pažadańni», — padkreśliŭ Šuškievič.
«Ja vielmi škaduju, što krainy Budapiešckaha miemaranduma paviali siabie pasiŭna. Ale pasprabujcie vy na Zachadzie supraćstajać Rasii vajennym čynam. Tych palitykaŭ, jakija heta buduć prapanoŭvać, nichto nie pieravybiera. Treba znachodzić inšyja mietady rašeńnia. Tut ža byŭ upuščany momant pryniaćcia takoha rašeńnia», — dadaŭ pieršy kiraŭnik niezaležnaj Biełarusi.
***
U 1994 hodzie byŭ składzieny Budapiešcki miemarandum. Zhodna ź miemarandumam, uličvajučy ŭziatyja Ukrainaj i Biełaruśsiu na siabie abaviazacielstvy ab likvidacyi ŭsich jadziernych uzbrajeńniaŭ ź jaje terytoryi ŭ vyznačany termin, ZŠA, Rasija i Vialikabrytanija paćvierdzili svaje abaviazacielstvy pa abaronie niezaležnaści i suvierenitetu jak Biełarusi, tak i Ukrainy.
Kali Stanisłaŭ Šuškievič ničoha nie pierabłytaŭ, to heta siensacyja, vykazvaje sumnieŭ sajt «Biełaruski partyzan». Bo vychodzić, što svaju palityku biaśpieki naša kraina, jak i Ukraina, budavała, aryjentujučysia na mižnarodnyja harantyi, jakija na samaj spravie isnavali tolki ŭ namierach. Praściej kažučy, jakija nie isnavali ŭžo i nie isnujuć.
Kamientary