«Reparciory bieź miežaŭ» znoŭ unieśli Łukašenku ŭ śpis «vorahaŭ presy»
Alaksandr Łukašenka znoŭ uklučany ŭ śpis «vorahaŭ presy», jaki rehularna składaje pravaabarončaja arhanizacyja «Reparciory bieź miežaŭ».
Jak adznačajuć «Reparciory bieź miežaŭ», zaraz Łukašenka sprabuje intehravacca ŭ mižnarodnuju supolnaść, «zhładžvajučy svoj vobraz apošniaha dyktatara Jeŭropy», adnak mienavita dziakujučy jamu Biełaruś moža ličycca «parkam Jurskaha pieryjadu savieckaj ery».
«Zakručvańnie hajek u 2011 hodzie, kali było zatrymana bolš za 100 žurnalistaŭ, ciapier skončyłasia, palityčnyja źniavolenyja byli vyzvalenyja, ale nasamreč ničoha nie źmianiłasia, — adznačajuć «Reparciory bieź miežaŭ». — Admova ŭ akredytacyi, pieraśled žurnalistaŭ, jakija pracujuć na zamiežnyja ŚMI, Ministerstva infarmacyi zrabiła bolš žorstkim kantrol za raspaŭsiudžvańniem drukavanych ŚMI. Robicca ŭsio mahčymaje, kab kantralavać internet».
Adznačajecca, što ŭ 2015 hodzie žurnalisty ŭ Biełarusi atrymali 28 štrafaŭ za «niezakonny vyrab i raspaŭsiudžvańnie infarmacyjnych materyjałaŭ». Varta adznačyć, što štrafy byli prysudžanyja žurnalistam, jakija supracoŭničali z zamiežnymi ŚMI biez akredytacyi.
Akramia Łukašenki u śpis uklučana jašče 35 palitykaŭ i arhanizacyj. U pryvatnaści, vorahami presy nazvanyja prezident Rasii Uładzimir Pucin, kiraŭniki Azierbajdžana, Banhładeš, Bachrejna, Vieniesueły, Jehipta, Zimbabvie, Kazachstana, Kitaja, Siryi, Turcyi, Čačni, Erytrei, a taksama mieksikanski narkokartel «Łos-Sietas» i hrupoŭka «Isłamskaja Dziaržava».
Kamientary