Biełaruskija aŭtadylery pryniali rašeńnie admovicca ad praviadzieńnia ŭ 2017 hodzie ŭ Minsku mižnarodnaha aŭtamabilnaha sałona «Motaršou». Pra heta 1 lutaha na pres-kanfierencyi ŭ Minsku paviedamili členy praŭleńnia Biełaruskaj aŭtamabilnaj asacyjacyi (BAA), jakaja abjadnoŭvaje dyleraŭ i imparcioraŭ aŭtamabilaŭ.
Jany patłumačyli, što heta rašeńnie — śledstva ahulnaj situacyi na aŭtamabilnym rynku i ŭ ekanomicy krainy ŭ cełym. «My chacieli b pravieści aŭtasałon u hetym hodzie, navat pravodzili ŭnutry asacyjacyi apytańnie, ale pryjšli da vysnovy, što ŭsiaho tolki siem udzielnikaŭ — heta ŭžo budzie nie «Motaršou». Na rynku ciapier aktyŭna pradajucca siem-dziesiać brendaŭ, dylery, jakija pradajuć mała, finansava nie zmohuć sabie dazvolić zrabić dobry stend. Bolš za toje, navat tyja, chto siońnia dobra pradaje mašyny, u bolšaści svajoj adčuvajuć finansavyja ciažkaści ŭ siłu vialikaj zakredytavanaści, biahučych vydatkaŭ i hetak dalej», — skazaŭ staršynia praŭleńnia BAA Siarhiej Michnievič.
U kiraŭnictvie asacyjacyi źviartajuć uvahu, što za niekalki apošnich hadoŭ šmat jakija biełaruskija dylery pabudavali pryhožyja aŭtacentry, a heta vielizarnaja finansavaja nahruzka.
«Akramia taho, «Motaršou» zaŭsiody ŭjaŭlała saboj śviata, i nam nie chaciełasia b pravodzić jaho ŭ niejkim urezanym biudžetnym varyjancie. Nam chočacca viarnucca da raniejšaha farmatu śviata, kali buduć finansavyja pieradumovy i aptymizm na rynku», — dapoŭniŭ Michnievič.
«My aptymistyčna hladzim na mahčymaść praviadzieńnia «Motaršou» ŭ 2018 hodzie, jak miarkujecca, heta budzie ŭ mai. Za hady svajho praviadzieńnia «Motaršou» nabyło peŭny status, i rabić jaho ciapier u niejkim kastryravanym vyhladzie my nie budziem», — skazaŭ Dźmitryj Jarota — kiraŭnik kampanii «Remark», jakaja tradycyjna źjaŭlajecca arhanizataram «Motaršou».
Apošni raz vystava «Motaršou» pracavała ŭ Biełarusi ŭ 2013 hodzie, i tady miescam jaje praviadzieńnia ŭpieršyniu byŭ abrany kańkabiežny stadyjon «Minsk-Areny». Svaje stendy pradstavili 24 aŭtamabilnyja marki. Usiaho na vystavie było raźmieščana kala 200 aŭtamabilaŭ. Pavodle źviestak arhanizataraŭ, jaje naviedała amal 65 tysiač čałaviek.
Kamientary