Rasieja moža vykarystać šyrokamaštabnyja vajennyja vučeńni «Zachad-2017» dla taho, kab pakinuć vajskovy kantynhient u Biełarusi na pastajanna. Pra heta zajaviŭ u čaćvier u intervju ahienctvu Reuters ministr abarony Estonii Marhus Cachkna.
Pavodle jaho słoŭ, Estonija i inšyja krainy NATA vałodajuć takimi raźviedźviestkami.
Dla pierakidvańnia vojskaŭ i ryštunku z Rasiei ŭ Biełaruś buduć vykarystany 4000 čyhunačnych vahonaŭ.
U vypadku raźmiaščeńnia rasijskich vojskaŭ u Biełarusi jany apynucca na miažy z Polščaj, Litvoj i Łatvijaj adrazu paśla raźmiaščeńnia ŭ hetych krainach šmatnacyjanalnych bataljonaŭ aljansa — kroku, raspačataha zachodnimi krainami ŭ adkaz na dałučeńnie Rasiejaj Kryma i zachopu ŭschodnich rajonaŭ Danbasa. Praŭda, uvieś dadatkovy kantynhient NATA ŭ krainach Bałtyi składaje tolki 4000 čałaviek.
«Dla rasijskich vojskaŭ, jakija adpraŭlajucca ŭ Biełaruś, heta kvitok u adzin kaniec», — skazaŭ Cachkna žurnalistam napiaredadni sustrečy ministraŭ abarony krain ES na Malcie.
Jon dadaŭ, što heta nie jaho asabistaje mierkavańnie, a aściarohi, jakija padzialaje ŭsio estonskaje kiraŭnictva. «My vielmi hłyboka analizujem, jak Rasieja rychtujecca da vučeńniaŭ «Zachad». My bačym, što jany robiać pa inšy bok miažy ES i NATA. Vojska mohuć tam zastacca paśla vučeńniaŭ», — zajaviŭ ministr.
Vučeńni «Zachad-2017» projduć z 14 pa 20 vieraśnia hetaha hoda adnačasova na niekalkich palihonach Rasii i Biełarusi. Na dumku sajuźnikaŭ NATA, udzieł u ich mohuć uziać bolš čym 100 tysiač vajskoŭcaŭ. Heta zrobić «Zachad-2017» najbolšymi vučeńniami Rasii ad 2013 hoda.
U NATA adznačajuć, što padčas papiarednich bujnamaštabnych manieŭraŭ u 2013 hodzie Rasieja adpracavała dziejańni śpiecnaza, jakija paźniej vykarystoŭvalisia padčas dałučeńnia Kryma. Prezident Litvy Dala Hrybaŭskajte raniej nazvała budučyja vučeńni Rasii i Biełarusi padrychtoŭkaj da vajny z Zachadam.
Kamientary