Davali da 20 hadoŭ turmy.
Sud u Čyli prysudziŭ da roznych terminaŭ turemnaha źniavoleńnia 106 byłych supracoŭnikaŭ śpiecsłužbaŭ i vajskoŭcaŭ za vykradańni i zabojstvy ŭ siaredzinie 1970-ch hadoŭ padčas kiravańnia Aŭhusta Pinačeta, pieradaje BBC.
Usie asudžanyja pracavali ŭ stvoranym Pinačetam upraŭleńni nacyjanalnaj vyviedki (DINA) i ŭdzielničali ŭ śpiecapieracyi «Kałomba», skiravanaj suprać pradstaŭnikoŭ apazicyi.
Eks-supracoŭnikaŭ DINA vinavaciać u dačynieńni da źniknieńnia i zabojstva 16 čałaviek. Jak adznačyŭ sudździa, usie zabityja byli čalcami sacyjalistyčnaj partyi ci levymi aktyvistami. Jany byli aryštavanyja ŭ Santjaha ad červienia 1974 da studzienia 1975 hoda. Zatym ich advieźli ŭ centry dla dopytaŭ, paśla čaho nichto nie bačyŭ ich žyvych.
Pavodle prysudu, abvinavačanyja atrymali ad paŭtara da 20 hadoŭ turmy, adnak mnohija ź ich užo adbyvajuć terminy pa inšych abvinavačvańniach.
Padčas kiravańnia Pinačeta (1973-1990) u Čyli prapali bieź viestak ci zahinuli kala 3 tysiač čałaviek, mnohija byli vymušanyja biehčy za miažu. Padčas apieracyi «Kałomba» prapali bieź viestak 119 čylijskich apazicyjanieraŭ. Ułady tłumačyli ich źniknieńnia tym, što jany byli vysłanyja z krainy i zabityja svaimi byłymi paplečnikami abo supracoŭnikami zamiežnych śpiecsłužbaŭ.
Pinačet pryjšoŭ da ŭłady ŭ 1973 hodzie ŭ vyniku vajskovaha pieravarotu, padčas jakoha byŭ zrynuty prezident-sacyjalist Salvador Aljende.
Kamientary