Da 10 kłasa himnazii nie buduć adroźnivacca ad škoł. Ekzamieny ŭ 5 kłas admieniać
Himnazii ŭ Biełarusi začyniać nie buduć, ale ekzamieny dla pastupleńnia tudy paśla čaćviortaha kłasa admieniać. Pra heta TUT.BY paviedamili ŭ Ministerstvie adukacyi. U himnazii dzieci buduć traplać pavodle terytaryjalnaj prykmiety, heta značyć pavodle prapiski. Bolš za toje, až da starejšaj škoły ŭ himnazijach i škołach budzie adnolkavaja prahrama.
U Ministerstvie adukacyi prakamientavali čutki pra toje, što himnazii buduć zakryvacca. Učora na hety kont piśmieńnica Jaŭhienija Pasternak vystupiła z adkrytym listom na adras ministra adukacyi Ihara Karpienki.
— Himnazii začyniacca nie buduć, jany zastanucca jak ustanovy adukacyi, — paviedamiła pres-sakratar Ministerstva adukacyi Ludmiła Vysockaja. — Ale admianiajem ekzamieny paśla čaćviortaha kłasa. Ustupnych ekzamienaŭ u piaty kłas nie budzie. Niachaj ludzi nie traciać hrošy i nie rychtujucca.
Navat ciapier Vasil Ivanavič Žarko (vice-premjer Biełarusi) skazaŭ: skažycie ŭsim, što nijakich ekzamienaŭ paśla 4 kłasa niama, dzieci pavinny mieć adnolkavy dostup da atrymańnia adukacyi.
U Ministerstvie adukacyi dadajuć, što pastupać u himnazii navučency buduć pa terytaryjalnaj prykmiecie, heta značyć pa prapiscy.
— A kali čałaviek nie prapisany pobač z himnazijaj, to jak jamu tudy trapić?
— A navošta «traplać» u himnaziju, kali ŭ škołach i himnazijach budzie adnolkavaja prahrama?
U Minadukacyi adznačajuć, što ad zvyčajnych škoł himnazii buduć adroźnivacca prahramaj paśla dziaviataha kłasa. Paśla jaho ž budzie i profilnaja adukacyja.
— Paśla dziaviataha kłasa budzie niezaležny ekzamien i voś tady ŭžo budzie pastupleńnie abo ŭ himnaziju, ci dalej, — adznačajuć u ministerstvie. — Dapuscim, ja ź inšaj škoły i chaču pastupić u himnaziju. Buduć pastupać tudy nie paśla čaćviortaha kłasa, a paśla dziaviataha. Kab dzieci sami matyvavana vybirali sabie tuju prahramu navučańnia, jakaja im cikavaja. Paśla dziaviataha — abo himnazija, ci škoła bazavaja, ci praftechvučyliščy. Heta ŭžo, ličy, darosły čałaviek, jaki sam moža vyznačycca.
Zrešty, kaža Ludmiła Vysockaja, pytańnie, kali mienavita buduć zdavać ispyty ŭ himnaziju, jašče vyrašajecca. — Moža, i paśla vośmaha kłasa. Tut treba pahladzieć, kab była padrychtoŭka.
U Minadukacyi adznačajuć, što ministr nakont himnazij užo pryniaŭ rašeńnie, a pytańnie admieny ekzamienaŭ paśla čaćviortaha kłasa ciapier vyrašajuć na zakanadaŭčym uzroŭni.
U ministerstvie adznačajuć, što navučalnyja płany škoł i himnazij ŭžo zaraz majuć minimalnyja adroźnieńni:
— U čym adroźnieńni navučalnaha płana na 2017-2018 navučalnyja hady ŭ himnazijach i škołach? U himnazijach na vyvučeńnie zamiežnaj movy ŭ 5—9 kłasach vydzialajecca piać hadzin suprać troch hadzin u škołach. I pa matematycy ŭ 8 i 9 kłasach — 5 hadzin suprać 4-ch hadzin u škołach.
Ludmiła Vysockaja adznačaje:
— Siońnia ŭ šmatlikich baćkoŭ jość pamyłkovaje mierkavańnie, što ŭ himnazijach niešta vyvučajecca na pavyšanym uzroŭni pa paraŭnańni sa zvyčajnymi škołami. Adroźnieńni minimalnyja. A dobry kalektyŭ vykładčykaŭ siońnia moža być i ŭ zvyčajnych škołach. A to siońnia my z himnazij robim niejkuju elitu. My choć i havorym, što ŭsio prazrysta pry pastupleńniach u piaty kłas u himnazii, ale siońnia stupień karupcyi nichto nie admianiaŭ. I kali słabaje dzicia pastupaje ŭ himnaziju, to potym na fonie mocnych dziaciej jano zanadta ŭžo vyłučajecca. Tak, u himnazijach jość profilnyja kłasy, dzie idzie pahłyblenaje navučańnie, tak hetyja profilnyja kłasy my chočam zaraz stvarać i ŭ zvyčajnych škołach, jak heta było raniej: matematyčny, humanitarny…
Nahadajem, što ŭ pačatku kastryčnika hetaha hoda vice-premjer Vasil Žarko vykazvaŭsia pra mahčymuju admienu ŭstupnych ekzamienaŭ u himnazii paśla čaćviortych kłasaŭ.
— Siońnia dzieci, jakija pastupajuć paśla čaćviortaha kłasa ŭ himnazii, atrymlivajuć stres i nie razumiejuć, navošta im heta treba. Ja liču, što dzieci pavinny mieć roŭnyja ŭmovy dla atrymańnia adukacyi, — zajaviŭ jon.
Raniej z takoj prapanovaj vystupiŭ ministr adukacyi Ihar Karpienka. Heta ahučyli na Respublikanskaj naradzie jašče ŭ žniŭni 2017 hoda.
Kamientary