Psichołah z Vałožyna robić ź miascovych maładzionaŭ ź sindromam Daŭna madelaŭ FOTY
Natchniŭšysia prykładam adnoj z samych viadomych madelaŭ ź sindromam Daŭna aŭstralijki Madelin Ściuart, psichołah Alena Ždaniuk z Vałožyna zachacieła zrabić niešta padobnaje z našymi biełaruskimi dziaŭčatami i zapuściła ŭ rodnym horadzie prajekt «Asablivaja pryhažość».
Alena Ždaniuk pracuje psichołaham u terytaryjalnym centry sacyjalnaha absłuhoŭvańnia nasielnictva i ŭ adździaleńni sacyjalnaj adaptacyi i reabilitacyi horada Vałožyna. Siarod jaje padapiečnych — maładyja ludzi ź invalidnaściu, u tym liku dziaŭčaty i chłopcy ź sindromam Daŭna. Jość u Aleny i chobi: stvaraje svaimi rukami ŭpryhožvańni pad brendam «Lenok Matylek». U niejki momant jana prydumała abjadnać pracu z zachapleńniem i vyrašyła, što było b zdorava rekłamavać aksesuary na madelach z asablivaściami.
«Mnie chočacca pałamać šabłonnaje i niaredka stereatypnaje ŭjaŭleńnie pra pryhažość», — dzielicca dziaŭčyna svajoj metaj. Da jaje Alena padyšła adkazna i nie prosta adfatahrafavała ŭpryhožvańni na dziaŭčatach (pačała z vyrabaŭ aŭtarstva Ksienii Majeŭskaj), a zładziła śpiecyjalny majstar-kłas ź pieršaj biełaruskaj madellu z DCP Anhielinaj Uelskaj. Taja navučyła dźviuch pieršych udzielnic prajektu «Asablivaja pryhažość» trymacca pierad kamieraj i paziravać.
Imi stali Hanna Raj i Nastaśsia Saŭčuk, jakija pryjechali na fotasiesiju ŭ Minsk razam z matulami i vydatna paziravali pierad kamieraj. Chutka ŭ ich na rukach budzie pieršaja prafiesijnaja fotasieryja.
Alena Ždaniuk choča, kab da jaje prajekta dałučylisia novyja ŭdzielniki i kab chacia b niechta ź jaje padapiečnych źviazaŭ žyćcio z madelnym biznesam, natchniŭšysia pieršym dośviedam pracy pierad kamieraj. A jašče — kab baćki «asablivych dziaciej» nie saromielisia ich, nie chavali ad śvietu, a dali mahčymaść być jaho častkaj.
Kamientary