Achviara napadu akuły: Ja adčuŭ, što ŭ ciele čahości nie chapaje, i heta była naha
23-hadovy Kaleb Suaniepoel z Kiejptaŭna straciŭ nahu z-za napadu akuły. Chłopiec zajmaŭsia siorfinham, kali zaŭvažyŭ drapiežnicu i padniaŭ tryvohu, ale dabracca da bieraha tak i nie paśpieŭ, raspaviadaje Daily Mail.
Kaleb Suaniepoel zajmaŭsia siorfinham razam z dvuma svaimi bratami, kali zaŭvažyŭ pobač vialikuju biełuju akułu. Jon tut ža padniaŭ tryvohu, i chłopcy stali z usich sił viesłavać da bieraha.
«Ja paviarnuŭsia da bratoŭ i kryknuŭ: «Akuła! Płyvicie!» My pačali hrebci tak chutka, jak mahli, ale ŭ mianie było žudasnaje pačućcio, što adbudziecca niešta drennaje. I ŭ hety momant ja adčuŭ, jak niešta ŭčapiłasia ŭ majo cieła».
Siorfier adčuŭ, što akuła sprabuje paciahnuć jaho ad bieraha, i staŭ supraciŭlacca z usich sił.
«Akuła schapiła mianie i paciahnuła pad vadu. Ja bieznadziejna sprabavaŭ stuknuć jaje i adčapić ad svajoj nahi. I tut ja adčuŭ, što niešta adździaliłasia, bolu nie było, ja prosta adčuŭ, što niešta pakinuła majo cieła».
Braty dapamahli akryvaŭlenamu chłopcu dabracca da bieraha. I vielmi svoječasova, bo akuła viarnułasia, kab adkusić ad achviary jašče adzin kavałak. Na ščaście, na hety raz sprava abyjšłasia ranaj. Chłopca terminova dastavili ŭ lakarniu, i lekary byli vymušanyja amputavać toje, što zastałosia ad jaho pravaj nahi, vyšej kalena.
«Spačatku praces adnaŭleńnia byŭ składanym. Kali ja byŭ u špitali, mnie było ciažka siadzieć u łožku. Ja pamiataju, jak mnie chaciełasia pačać ruchacca i vykarystoŭvać mylicy».
Zaraz spartsmien užo całkam adnaviŭsia i nie tolki navučyŭsia chadzić na pratezie, ale i viarnuŭsia da siorfinhu. U najbližejšy čas jon płanuje pierajechać u Vialikabrytaniju, kab atrymać stupień mahistra. I sapraŭdy viedaje, što navat paśla napadu akuły možna žyć poŭnym žyćciom.
«Ja chaču, kab ludzi viedali, što strata nahi — heta nie kaniec».
Kamientary