Kali Łukašenka sapraŭdy zakryje naftapravody z rasijskaj naftaj, ci buduć heta vialikija straty dla Rasii? Tak, vialikija
«Toj dziŭny momant, kali nie Łukašenku vykručvajuć ruki, a naadvarot», — tak pra słovy kiraŭnika Biełarusi napisaŭ adzin rasijski telehram-kanał, jaki pracuje na aŭdytoryju našaj krainy.
Alaksandr Łukašenka 11 krasavika pravodziŭ naradu z ekanamičnym błokam urada. Raptoŭna jon źviarnuŭsia da vice-premjera Ihara Lašenki, jaki adkazvaje va ŭradzie za enierahapastaŭki, z prapanovaj zakryć na ramont naftapravody, pa jakich rasijskaja nafta pastupaje ŭ Jeŭropu.
Kiraŭnik Biełarusi skazaŭ, što nieabchodnaść ramontu provadaŭ uźnikła «hod ci paŭtara nazad», ale biełaruski bok nie išoŭ na toje, kab ich zakryvać na niekalki dzion, bo heta b pryniesła straty rasijskamu boku.
«Kali treba pastavić na ramont naftapravody i naftapraduktapravody, jakija iduć praź Biełaruś, staŭcie i ramantujcie. Bo toje dabro, jakoje my robim dla Rasijskaj Fiederacyi, jano nam viartajecca pastajanna złom. Tam užo zrabilisia nachabnymi da takoj stupieni, što pačynajuć nam vykručvać ruki», — skazaŭ Łukašenka.
Čytajcie: Łukašenka dazvoliŭ pry patrebie zakryć na ramont naftapravody z rasijskaj naftaj
Na takija słovy daviałosia reahavać u Kramli. Pres-sakratar Uładzimira Pucina Dźmitryj Piaskoŭ zaznačyŭ: «My nie možam pahadzicca z Alaksandram Ryhoravičam, nijakija sankcyi Rasija nie ŭvodzić. Jość pytańni, pa jakich niama kančatkovaha razumieńnia, ale Rasieja prychilnaja sajuznaj dziaržavie. Biezumoŭna, my prychilniki tanalnaściaŭ, jakija bolš adpaviadajuć našym adnosinam».
Kali ŭjavić, što Alaksandr Łukašenka pojdzie na taki krok i pierakryje naftapravody na niekalki dzion, to ci adčuvalna heta budzie dla Rasii? Ekanamičny ahladalnik Taćciana Manionak miarkuje, što adčuvalna.
Abjomy tranzitu rasijskaj nafty praź Biełaruś u Jeŭropu źmianšajucca. Na siońnia jany składajuć krychu bolej za 50 miljonaŭ tonaŭ na hod, a jašče siem hadoŭ tamu hetaja ličba składała 75-80 miljonaŭ — tracina ŭsiaho rasijskaha ekspartu. Rasija praciahvaje dyviersifikoŭvać šlachi pastaŭki nafty ŭ krainy Jeŭropy, kab nie zaležać ad adnoj krainy.
Jak by toje nie było, ale rasijskija naftavyja kampanii adčujuć niepryjemnaści, kali Łukašenka navažycca na taki krok. «Kantrakty padpisanyja. I heta i hrašovyja, i reputacyjnyja straty. Łahistyka adpracavanaja, i jaje chutka nie źmieniš», — miarkuje Manionak.
Pa jaje mierkavańni, Łukašenka skazaŭ heta ŭ rečyščy strataŭ, jakija biełaruski bok panios ad tak zvanaha «hazavaha manieŭra» Rasii. «Nie tak daŭno prahučała zajava, što Biełaruś płanuje pavialičyć ceny za tranzit na 23%. Vyhladaje, što heta akurat sproba kampiensavać straty ad «hazavaha manieŭra». Padobna, što Rasija pakul nie śpiašajecca abmiarkoŭvać prapanovy Biełarusi, tamu hetaja zajava mahła być zroblena dla aktyvizacyi pieramoŭnaha pracesu», — kaža Manionak.
Jana miarkuje, što takija słovy Alaksandra Łukašenki mohuć tolki pahoršyć situacyju: «A ŭjavicie, kali ŭ adkaz Rasii prypynić pastaŭki naftapraduktaŭ na biełaruskija pradpryjemstvy».
Kamientary