Kiraŭnik supołki «Heta Minsk, dzietka!»: Mianie sprabavali vierbavać, pahražali adkaznaściu za raspalvańnie varožaści
Błohier i kiraŭnik supołki UKantakcie «Heta Minsk, dzietka» (82 tysiačy padpisčykaŭ) Jaŭhien Małachoŭski raskazaŭ «Našaj Nivie» pra dziŭny pachod u orhany, padčas jakoha jaho sprabavali vierbavać.
Supołka «Heta Minsk, dzietka» raźmiaščaje naviny i prykoły pra stalicu, ale nie abychodzić palityčnych tem i časam daje vielmi žorstkija acenki realijam.
Małachoŭski kaža, što 13 studzienia jamu patelefanavali i biez pozvy vyklikali ŭ HUBAZiK z arhumientacyjaj, što heta ŭ jaho ž intaresach «u suviazi z surjoznaściu spravy».
«Ja pryjechaŭ, telefon pakinuŭ u mašynie, kab nie zdavać jaho na ŭvachodzie siłavikam. Heta ich ździviła, darečy, — raskazvaje Małachoŭski. — U kabiniecie mianie čakali čaćviora čałaviek. Try ź milicyi, jak ja zrazumieŭ, a jašče adzin, pa-mojmu, supracoŭnik inšaha viedamstva, jaki pavodziŭ siabie jak haspadar, a padčas razmovy prapanoŭvaŭ mnie supracoŭničać i pačać z taho, kab nazvać imiony inšych administrataraŭ supołki i raskazać, jakich pohladaŭ jany prytrymlivajucca, jakija mety staviać».
Sa słovaŭ Małachoŭskaha, tut jon zrazumieŭ, što adbyvajecca, i pierastaŭ adkazvać na pytańni, paśla čaho jaho pačali zapałochvać.
«Adzin ź ich skazaŭ mnie, što nasamreč mianie vyklikali, kab «admazać», bo «vyšej užo pačaŭsia ruch». I, maŭlaŭ, jość vierahodnaść zaviadzieńnia spravy za raspalvańnie varažniečy za niekatoryja dopisy ŭ pabliku, tamu treba pasprabavać «damovicca».
Ja admoviŭsia ad usialakaj supracy, u vyniku heta skončyłasia dačaj tłumačeńniaŭ i padpiskaj papiery, što ja papiaredžany ab niedapuščalnaści ŭdziełu ŭ niesankcyjanavanych akcyjach i raspalvańnia mižnacyjanalnaj varažniečy. Toj «hałoŭny» supracoŭnik, u jakim ja baču śpiecsłužbista, kazaŭ mnie, što jany nibyta «adkryty dla supracoŭnictva», i ja mahu zaŭsiody źviazacca i być u biaśpiecy», — skazaŭ Małachoŭski.
Sam błohier źviazvaje hetuju sustreču z nabližeńniem prezidenckaj kampanii.
Čytajcie taksama: MUS pra administratara supołki UKantakcie, jakoha nibyta vierbavali: Jon vydumlaje, u HUBAZiK jaho vyklikali pa zajavie
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary