«Pryčyna zakryćcia halerei — jaje nierentabielnaść», — kaža haspadar kramy i pamiaškańnia Pavieł Rysakoŭ.
Papularnaja mastackaja halereja «Padziemka», jakaja dziejničała ŭ adnajmiennaj kramie na praśpiekcie Niezaležnaści, spyniaje svajo isnavańnie. Krama «Padziemka», na terytoryi jakoj pracavała halereja, zastajecca.
«U pracesie rearhanizacyi pryvatnaj jurydyčnaj asoby, na bazie jakoj z 2004 hodu ŭźnikła halereja «Padziemka», skasavanaje strukturnaje padraździeleńnie, dyrektarkaj jakoha była ja, — kaža Valancina Kisialova. — Novaje kiraŭnictva, praihranaravaŭšy ŭsie papiarednija damoŭlenaści, zajaviła ab niemahčymaści dalejšaha supracoŭnictva. Usio zdaryłasia za adzin dzień: haspadar kramy i pamiaškańnia zajaviŭ, što farmat halerei jamu niecikavy i tamu jon jaje začyniaje».
«Pryčyna zakryćcia halerei — jaje nierentabielnaść, — skazaŭ nam pa telefonie haspadar pamiaškańnia Pavieł Rysakoŭ, — Situacyja niepryjemnaja jak dla mianie, tak i dla Valanciny, ale ja nie baču pierśpiektyvy ŭ halerei i vystavach na terytoryi kramy. Razam z tym, sama krama nie začyniajecca — u dadatak, jak nazyvałasia, tak i budzie nazyvacca «Padziemkaj». I tavar zastaniecca bolš mienš toj samy — chiba bolš nie budzie vystavaŭ».
Halereja «Padziemka» ŭ kramie «Padziemka» ŭ apošnija hady pieratvaryłasia ŭ papularnuju i zapatrabavanuju placoŭku dla ładžańnia šmatlikich vystavaŭ i prezientacyjaŭ. Nie tak daŭno, naprykład, u joj prachodziła aŭtarskaja vystava Adama Hłobusa. U samoj kramie «Padziemka» pradajucca suvieniry, prykładnoje mastactva, dyski i indyjskija tavary. Na bazie kramy taksama pracuje kniharnia, dzie pradajucca zbolšaha biełaruskija knihi.
Valancina Kisialova dadaje, što halereja «Padziemka» budzie isnavać u internet-farmacie pa adrasach podzemka.org i artpodzemka a zapłanavanyja na bližejšyja paŭhody kulturnyja prajekty buduć pravodicca na inšych placoŭkach Mienska.
Kamientary