Što zaraz z Ramanam Zajcavym, u jakoha padčas pratestaŭ na stele prylacieła hranata
Fotazdymki z Ramanam Zajcavym, jaki lažyć na travie ŭvieś u kryvi, u pieršyja sutki paśla vybaraŭ ablacieli ŭsie telehram-kanały. Padčas razhonu pratestoŭcaŭ, jakija sabralisia la steły 9 žniŭnia, prosta la jaho ŭzarvałasia śviatłošumavaja hranata. Raman atrymaŭ paškodžańnie lohkaha, rvanyja rany ad askiepkaŭ, udar serca, čerapna-mazhavuju traŭmu. Maładomu čałavieku adarvała dźvie fałanhi palcaŭ na pravaj ruce. Dva dni jon pravioŭ u miedykamientoznaj komie. Pra toje, jak jon pačuvajecca ciapier, nam raspaviała jaho žonka Alina.
Alina i Roma ŭ šlubie ŭžo siem hod. Paznajomilisia jany ŭ horackaj himnazii, ale sustrakacca pačali paśla jaje skančeńnia. Roma napisaŭ Alinie ŭ internecie, pavinšavaŭ z dniom narodzinaŭ. Praz try miesiacy maładyja hulali viasielle. U pary dvoje dziaciej: piacihadovy syn i dačka, jakoj niama jašče i hodzika.
Niejki čas Raman pracavaŭ nastaŭnikam fizkultury ŭ škole, ale hrošaj nie chapała, tamu jon pačaŭ jeździć na zarobki ŭ Rasiju. Kali ž tam uviali karancin praz karanavirus, chłopiec znajšoŭ pracu ŭ Minsku ŭ budaŭničaj śfiery. Siamja ŭvieś hety čas zastavałasia ŭ Horkach.
9 žniŭnia, raskazvaje Alina, jana pradčuvała, što zdarycca niešta kiepskaje.
«Roma pavinien byŭ pryjechać na vychodnyja 8—9 žniŭnia ŭ Horki, kab prahałasavać, ale z pracaj nie atrymlivałasia. Ën prasiŭ, kab choć ja prahałasavała, dla jaho heta było važna. Uvieś dzień u mianie było kiepskaje pradčuvańnie, ja mužu tak i skazała: «Niešta siońnia zdarycca. Hladzi ničoha nie ŭčyni». Roma mianie supakoiŭ, i my ź dziećmi lahli spać, tym bolš internet nie pracavaŭ», — kaža Alina.
U dźvie hadziny nočy Alinie patelefanavała siastra z Čechii, skazała, što ŭ telehram-kanałach źjavilisia fotazdymki z chłopcam, vielmi padobnym da Romy.
«Ja nabrała Romu, jon byŭ niedastupny. Pačała abtelefanoŭvać balnicy, mnie paćvierdzili, što jon u 2-j haradskoj lakarni na ekstrennaj apieracyi. Dziažurny doktar skazaŭ, što epikryz u Romy — na vialiki list. Šancy byli nievialikija: stan muža byŭ ciažki», — raspaviadaje Alina.
Paźniej Romu pieraviali ŭ vajenny špital, ciapier jon znachodzicca tam. Jak tolki jon pryjšoŭ u siabie i jaho dazvolili naviedvać, Alina časova pierabrałasia ŭ Minsk. Dzieci zastalisia z babulami.
«Stan muža zdavalniajučy, jon užo moža sam pierasoŭvacca pa pałacie. Ale pakul jamu ciažka razmaŭlać, jon drenna čuje (Romu čakaje apieracyja na vušach). U jaho strašnyja rany na hrudziach — tam prosta dzirki — i adarvanyja druhi i piaty palcy. Ja, praŭda, žartuju, što toj, na jakim treba nasić piarścionak, u jaho ceły, tak što ŭsio narmalna. A šnary ŭpryhožvajuć mužčynu. Bližejšy miesiac dakładna Roma praviadzie ŭ balnicy. A dalej budzie bačna — pakul nichto nie moža skazać».
Alina kaža, što muž vielmi pieražyvaje, što ŭsio tak zdaryłasia, što jon pakinuŭ siamju biez karmiciela. Ich ratuje padtrymka siabroŭ, znajomych z roznych kutkoŭ śvietu i kaleh.
«Roma nie toje što hłyboka cikaviŭsia palitykaj, ale vybary jaho čaplali mocna. Staviŭ u prykład Polšču, jakaja niekali była biadniejšaj, a ciapier tudy ŭsie jeździać na zarobki. Kazaŭ, što i nam patrebny novy prezident, što treba, narešcie, pierastać žyć «u dupie». Kazaŭ, što treba hałasavać za Śviatłanu Cichanoŭskuju. Roma byŭ za pieramieny. I kali ŭsio tak zdaryłasia, stolkich ludziej pakalečyła — vidavočna, što jany nam asabliva patrebnyja», — tłumačyć Alina.
Padtrymać siamju ŭ hety momant možna, pieravioŭšy hrošy Alinie na kartku:
5470 8700 4914 5739 (termin dziejańnia 11/21)
U bližejšyja dni siamja taksama adkryje rachunak u banku — my adrazu paviedamim jaho. Taksama Alina prosić adhuknucca kožnaha, chto moža padkazać dobraha advakata, akazać jurydyčnuju kansultacyju.
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč36
Kamientary