U Viciebskim ankadyspansiery razburyłasia prybudova, adkul chvorym išoŭ kisłarod
Na terytoryi Viciebskaha abłasnoha kliničnaha ankałahičnaha dyspansiera abrynułasia ściana ŭ budynku stancyi, adkul padavaŭsia kisłarod u karpusy z chvorymi. «Heta adbyłosia ŭ piatnicu, 26 sakavika. Ale my apieratyŭna spravilisia ź situacyjaj: chvorych pieraviali ŭ novy korpus, a kisłarod pačali padavać ź inšaj stancyi ŭ našaj balnicy», — paviedamiła Tut.by hałoŭny doktar ankadyspansiera Anžeła Tomčyna.
Budynak kisłarodnaj stancyi na terytoryi ankadyspansiera častkova razburyŭsia 26 sakavika.
— Naša kisłarodnaja stancyja nie była raźličana na pandemiju, na takuju kolkaść bałonaŭ, jakaja vykarystoŭvajecca pry lačeńni karanavirusnych chvorych. Raniej, pry zvyčajnaj nahruzcy, my štodnia vykarystoŭvali kala 25 bałonaŭ, a ciapier u sutki sychodziła kala 100. Vibracyja na ścieny budynka była vialikaj, i adbyłosia razbureńnie adnoj ź ich. Tym bolš hetaja pabudova ŭžo staraja, — tłumačyć Anžeła Tomčyna.
Hałoŭny doktar kaža, što «situacyja nie avaryjnaja».
— Jak tolki pa budynku pajšli raskoliny, my chutka pryniali ŭsie miery. Pacyjentaŭ pieraviali ŭ reanimacyju druhoha chirurhičnaha korpusa, jaki ŭ nas adkryŭsia miesiac tamu. Tut ža adklučyli padaču kisłarodu ŭ budynku, jaki razburyŭsia, vynieśli adtul usie bałony, pieranieśli ich u inšuju kisłarodnuju stancyju — jana adnosicca da hetaha ž, novaha chirurhičnaha korpusa. I tam iduć apieracyi, pracuje reanimacyja — usio ŭ štatnym režymie, ničoha strašnaha nie adbyłosia. Usie słužby spracavali apieratyŭna: i kisłarodčyki, i aniestezijołahi.
U tym budynku zrobiać ramont:
— Upraŭleńnie achovy zdaroŭja nam vydzieliła hrošy na ramont, i my chutka likvidujem prablemu. Pry hetym nie prosta zrobim ramont, a pastarajemsia madernizavać stancyju, kab jana vytrymlivała vialikuju nahruzku.
Druhi chirurhičny korpus abłasnoha ankadyspansiera adkryŭsia paśla rekanstrukcyi ŭ kancy lutaha 2021 hoda.
Korpus pabudavali ŭ 1979 hodzie, a rekanstrukcyju jaho pačali ŭ 2007-m. Na hety čas chirurhičnyja ankałahičnyja adździaleńni ahulnaj ankałohii, puchlin hałavy i šyi pierajechali ŭ radyjełahičny korpus № 3, urałahičnaje — u chirurhičny korpus № 5. Za hady budoŭli ad staroha budynka praktyčna ničoha nie zastałosia, mnohaje zamianili, a taksama ŭźviali čaćviorty pavierch. U budynku 150 łožkaŭ.
Kamientary