Niečakanyja fakty pra Volhu Niafiodavu i Rusłana Alachno, jakija stali zasłužanymi artystami Biełarusi
Litaralna dniami stała viadoma, što ŭ krainie papoŭniŭsia śpis zasłužanych artystaŭ Biełarusi. Takija zvańni atrymali mastacki kiraŭnik Kupałaŭskaha teatra Volha Niafiodava i śpiavak Rusłan Alachno. Sabrali niekatoryja niečakanyja fakty pra ich.
Zavaliła ispyty ŭ instytucie z-za zornaj chvaroby.
Volha Niafiodava nie pastupiła ŭ Maskvu ŭ Dziaržaŭny instytut teatralnaha majsterstva (HITIS), zavaliŭšy apošni ekzamien — sačynieńnie, jakoje z-za zornaj chvaroby «pisała adnoj levaj. Za ŭsio junactva strašniejšaha ŭdaru nie było».
Pracavała na farforavym zavodzie
Paśla pravału ispytaŭ jana viarnułasia ŭ Minsk i pajšła pracavać na farforavy zavod.
«I heta była sapraŭdnaja škoła žyćcia», — zhadvała aktrysa. «Samaje strašnaje dla mianie — rańni padjom. Mama palivała mianie vadoj, kab ja pračnułasia a šostaj ranicy, bo a vośmaj treba być na zavodzie. Spačatku pracavała rabočaj: ličyła talerki i sačyła, kab jany byli nie bityja, staviła ich u skryni i padymała na kanviejer.
A praź niekalki miesiacaŭ ja stała kantralorkaj ATK, a heta jašče horš, čym prosta rabočy. Ja pavinna była chadzić ź liniejkaj i vyjaŭlać brak. Dobra, što farforavy zavod byŭ u maim žyćci, bo na nastupny hod ja adrazu pastupiła».
10 hadoŭ spuskała hrošy ŭ kazino
«Heta byŭ pieryjad žyćcia z 1995-ha pa 2005-y. «Niekalki mašyn, dumaju, ja prajhrała. Hanarary za zdymki tady byli dobryja. Heta sapraŭdy chvaroba, pry dapamozie mamy ja zmahła spynicca», — zhadvała Volha.
Bolš za 20 hadoŭ nie mieła hałoŭnych rolaŭ u Kupałaŭskim
U adnym sa svaich intervju Niafiodava kryŭdziłasia, što mastacki kiraŭnik Kupałaŭskaha teatra Mikałaj Pinihin nie davaŭ joj hałoŭnyja roli.
«Ja 26 hadoŭ pracuju ŭ Kupałaŭskim teatry, ale samyja hałoŭnyja i krutyja svaje roli syhrała ŭ pieršyja try hady. … Mahčyma, tamu što ŭ mianie składany charaktar, ja mahu spračacca z režysioram, kali mnie niešta nie padabajecca. Ciapier ža iduć pa šlachu najmienšaha supracivu, śpiektakli časam robiać za miesiac. Usio krucicca vakoł spažyvieckaha śvietu, teatr. Niejkija roli mnie siońnia adšpilvaje — mienavita «adšpilvaje», — kazała jana ŭ intervju 2018-ha hoda.
Raspłakałasia pierad Łukašenkam
U lutym 2021 hoda, kali Łukašenka naviedaŭ teatr, Volha navat raspłakałasia pierad im. Jana zajaviła, što vielmi chvaravita ŭspryniała sychod z teatra značnaj častki trupy i joj soramna za kalehaŭ.
«Stajała ŭžo takoje pytańnie — radzimy. Nie prosta ściahi, jašče niešta. A mienavita radzimy, jakuju sapraŭdy chapnuć i nie zaŭvažać. Tut hłabalny momant. Jak jany nie zrazumieli? Čamu jany tak kupilisia? Zdali za biescań, nie padumaŭšy? Ja nie viedaju…» — emacyjna vykazałasia tady artystka.
Ihrała «Paŭlinku» na adkryćci ałkaholnaj kramy
U červieni 2021 hoda Niafiodava, užo ŭ statusie mastackaha kiraŭnika Kupałaŭskaha teatra, vystupiła na adkryćci kramy ałkaholu «Biełmytniaservis» u Maładziečnie. Razam ź viadomaj aktrysaj Kupałaŭskaha teatra Tamaraj Mironavaj jana ihrała ŭryvak z pjesy «Paŭlinka».
Cikavostki pra Rusłana Alachno
Prasłaviŭsia ŭ 2004-m, kali pieramoh na prajekcie «Narodny artyst — 2». Jaho pieśnia «Nieobyknoviennaja» hučała na ŭsich FM-stancyjach, a Rusłana stali achvotna zaprašać na roznyja imprezy i kancerty.
Atrymaŭ u padarunak pamiaškańnie ŭ Baranavičach
U 2007 hodzie prajšli čutki, što Rusłan adkryje svoj restaran u Baranavičach, jamu padaryli pamiaškańnie. Adnak jon prosta pradaŭ jaho. «Zarabiŭ niadrenna, choć ciapier heta kaštavała b daražej», — kazaŭ jon.
Taksama ŭ to čas viadomaja biełaruskaja kampanija bializny vypuskała rečy ź jaho imiem i inicyjałami.
Pradstaŭlaŭ Biełaruś na «Jeŭrabačańni»
U 2008-m hodzie Alachno vystupaŭ na konkursie ź pieśniaj Hasta la Vista, adnak nie zdoleŭ prabicca ŭ finał, zaniaŭšy ŭ svaim paŭfinale 17-je miesca.
Darečy, vyjhraŭ toje «Jeŭrabačańnie» Dzima Biłan, a ŭ nastupny hod, u 2009-m, u Maskvie pieramohu atrymaŭ uradženiec Minska Alaksandr Rybak, jaki pradstaŭlaŭ Narviehiju.
Maje orden «Za ŭkład i raźvićcio kultury Rasii»
U 2014-m hodzie rasijskaja «Mižnarodnaja akademija hramadskaha pryznańnia» ŭznaharodziła Rusłana Alachno ordenam «Za ŭkład i raźvićcio kultury Rasii».
Byŭ u šlubie z papularnaj aktrysaj Irynaj Miadźviedzievaj
Iryna Miadźviedzieva, jakaja stała viadomaj praz papularnuju pieradaču «6 kadraŭ», jak i Rusłan, adpravilisia šturmavać Maskvu ŭ 2004 hodzie.
Para piać hadoŭ žyła hramadzianskim šlubam, a aformili svaje adnosiny tolki ŭ lipieni 2009 hoda. Adnak šlub raspaŭsia ŭžo ŭ 2011 hodzie. Tym nie mienš, Rusłan Alachno i Iryna Miadźviedzieva paśla zastalisia dosyć blizkimi ludźmi.
Pravaliŭsia ŭ rasijskim «Hołasie»
U 2019-m Rusłan vyrašyŭ paŭdzielničać u rasijskim šou «Hołas». Pa jaho słovach, kab pasprabavać svaje siły i lišni raz nahadać pra siabie, adnak z treskam pravaliŭsia.
Paśla vykanańnia pieśni estonskaha śpievaka Jaaka Joały «Padbiaru muzyku» nichto z členaŭ žury nie paviarnuŭsia da jaho (h. zv. ślapoje hałasavańnie»), i biełaruski vykanaŭca nie prajšoŭ u nastupny etap.
Valeryju Siutkinu nie spadabałasia zališniaja akademičnaść, a Kanstancin Mieładze naohuł zajaviŭ, śpievy Rusłana padobnyja na restarannyja i ich treba słuchać «vypiŭšy».
Maje miedal Francyska Skaryny
U tym ža 2019-m Rusłan byŭ uznaharodžany miedalom Francyska Skaryny, što, pa jaho słovach, «stała vielmi chvalujučaj padziejaj u jaho žyćci».
Źniaŭsia ŭ našumiełym klipie «Lubimuju nie otdajut»
«Maja pazicyja — za mir i družbu z Rasijaj, za mir u majoj krainie, — tłumačyŭ jon uvosień 2020-ha. — Pieśnia «Lubimuju nie otdajut» — paćviardžeńnie tamu».
Rusłan atrymaŭ vialikuju porcyju krytyki. Adnak tady jon vykazaŭ mierkavańnie, što naŭrad ci jamu ŭ kamientarach pišuć biełarusy. «Dumaju, dzieści siadziać ludzi, skažam tak, u najbližejšym zamiežžy — u Litvie, Polščy — adtul prychodziać takija listy», — skazaŭ jon.
Kamientary