Padatkovaja rastłumačyła, kamu daviadziecca płacić padatak za zbor hryboŭ i jahad
U Ministerstvie pa padatkach i zborach patłumačyli ŭmovy apłaty padatku na zbor jahad, hryboŭ i lekavych raślin. Davać spravazdaču za takoje chobi, navat kali jano adnačasova i sposab zarobku, jak vyśvietliłasia, pryjdziecca tolki ŭ asobnych vypadkach. Pry hetym čałavieku nie treba budzie samastojna iści ŭ padatkovuju. Pra heta ŭ efiry Biełaruskaha telebačańnia skazaŭ Andrej Kavaleŭski, načalnik Hałoŭnaha ŭpraŭleńnia padatkaabkładańnia fizičnych asob Ministerstva.
«Kali padatkovy orhan robić kantrol za dachodami i vydatkam hramadzianina, jon pytajecca: dzie ž vy ŭziali srodki dla nabyćcia darahoha transpartu, nieruchomaści i hetak dalej? A płacielščyk zajaŭlaje, što hetyja srodki jon zarabiŭ ad zboru i zdačy hryboŭ i jahad. Tolki ŭ hetym adzinym vypadku moža być dapłata padatku», — rastłumačyŭ čynoŭnik.
Pryčym naličvacca hety padatak budzie tolki ŭ tym vypadku, kali ahulnaja suma dachodaŭ ad zboru jahad ci hryboŭ pieravysić 200 bazavych vieličyń — heta kala 6400 biełaruskich rubloŭ. Pamier padatku ŭ takoj situacyi składzie 10 % ad zaroblenaj sumy.
Kali ž čałaviek prosta źbiraje jahady ci hryby i ich zdaje abo pradaje, to źviartacca ŭ padatkovuju inśpiekcyju jamu, pa słovach Andreja Kavaleŭskaha, nie pryjdziecca, navat kali pamier jahonaha dachodu i pieravysiŭ 200 bazavych za hod.
Kamientary