U Kramli prapanavali biełaruskim škołam pieraniać «Razmovy pra važnaje». Što heta takoje
Načalnik upraŭleńnia prezidenta RF pa hramadskich prajektach Siarhiej Novikaŭ prapanavaŭ Biełarusi pieraniać z ulikam śpiecyfiki biełaruskaha hramadstva praktyku praviadzieńnia ŭ škołach «Razmoŭ pra važnaje».
Pra heta jon zajaviŭ na miedyjaforumie «Biełaruś — Rasija: raŭnapraŭny sajuz, ahulnaja historyja, sumiesnaja budučynia», jaki prachodzić u sieradu ŭ TASS.
«Što my robim — viarnuli całkam sistemu vychavańnia ŭ školnuju adukacyju, my navučyli i ŭkaranili staŭki ludziej, jakija adkaznyja ŭ škole tolki za vychavańnie, tamu što heta nie moža rabić nastaŭnik-pradmietnik u dadatak da svajoj asnoŭnaj dziejnaści, heta pavinien być piedahahičny rabotnik, jaki śpiecyjalna prajšoŭ navučańnie», — adznačyŭ Novikaŭ.
«Stvaryli ŭnutry školnaha raskładu časovyja słoty dla takich razmoŭ, nazvali prajekt «Razmovy pra važnaje». <…> Heta naš vopyt, my hatovy padzialicca, vielmi dobra, što siońnia prysutničajuć ministry adukacyi abiedźviuch krain (Rasii i Biełarusi)», — dadaŭ jon.
Novikaŭ adznačyŭ, što za pieryjad ź vieraśnia pa śniežań skłałasia stanoŭčaje ŭsprymańnie «Razmoŭ pra važnaje» siarod školnikaŭ, piedahohaŭ i baćkoŭ.
«U naroda na samaj spravie jość zapyt na hramadska-palityčny paradak u ramkach školnaha pracesu. Adukacyja ŭ nas ciapier składajecca z dvuch kitoŭ — navučańnie plus vychavańnie. I heta sustrakaje padtrymku i karystajecca popytam. U danym vypadku chacieli b prapanavać, ni ŭ jakim razie nie naviazvajučy, hetuju praktyku raspaŭsiudžvać, naturalna, z ulikam śpiecyfiki biełaruskaha hramadstva i biełaruskaha zapytu z boku baćkoŭ i piedahohaŭ, i z boku dziaciej», — skazaŭ jon.
Štotydniovyja zaniatki «Razmovy pra važnaje» pačalisia ŭ škołach Rasii z 5 vieraśnia. Jany prachodziać pa paniadziełkach. Scenary zaniatkaŭ — dla školnikaŭ roznych uzrostaŭ, ź pieršaha pa adzinaccaty kłas. Miarkujecca, što ŭsiaho ich budzie 34 — pa kolkaści navučalnych tydniaŭ u hodzie. Dla kožnaha ŭroka raspracavany mietadyčnyja rekamiendacyi, u jakich apisany źmiest, paśladoŭnaść etapaŭ zaniatku, padadzieny dapamožnyja materyjały dla nastaŭnikaŭ, instrukcyi dla interaktyŭnych zadańniaŭ i hetak dalej.
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč27
Kamientary