Ukrainskija dakumientałki možna budzie pahladzieć anłajn na kinafeście — za dalar abo naohuł biaspłatna
Z 9 pa 18 śniežnia možna budzie pahladzieć dakumientalnyja stužki pra Ukrainu. Adbudziecca heta na kinafiestyvali «1084. Na miažy», što projdzie anłajn u Biełarusi.
1084 kiłamietry — heta praciahłaść ahulnaj miažy pamiž Biełaruśsiu i Ukrainaj. Fiestyval prapanuje zadumacca pra budučyniu stasunkaŭ pamiž dźviuma nacyjami i biesstaronna abmierkavać ich sučasnaje stanovišča dy adnosiny prostych ludziej adno da adnaho. Arhanizatary abiacajuć nie pakinuć biez uvahi i padtrymku biełarusami ŭkrainskaha naroda, jaki zmahajecca z akupantami, a taksama padtrymku biełarusaŭ ukraincami ŭ baraćbie z dyktaturaj i teroram.
Arhanizatary prapanujuć biełarusam pahladzieć anłajn filmy pra kulturu i historyju Ukrainy, pra ŭkrainskija harady i ich žycharoŭ, jakija pieražyli rasijskuju akupacyju.
Hladzieć filmy ŭ Biełarusi biaspłatna možna budzie pa promakodzie. U luby zručny čas z 9 pa 18 śniežnia vybierycie ŭ śpisie cikavy vam film i naciśnicie «hladzieć». Vas pieranakiruje na płatformu ŭkrainskaha anłajn-kinateatra Takflix, dzie treba budzie zarehistravacca. Paśla ŭvachodu ŭviadzicie promakod fest1084, kab mieć mahčymaść hladzieć kino biaspłatna.
Kali vy chočacie pahladzieć filmy nie ź Biełarusi, vam treba budzie zrabić usie tyja ž manipulacyi, ale promakod na hety raz budzie inšy. U adpaviednym poli ŭviadzicie TAKfest1084 — heta daść vam źnižku 50 % na kvitok. Bolšaja častka stužak budzie kaštavać kala $1,3. Pałova hrošaŭ ad prodažu biletaŭ na Takflix idzie režysioram, častka ź jakich ciapier abaraniaje svaju krainu. Nabyty kvitok dziejničaje 7 dzion.
Arhanizatar fiestyvalu — pravaabarončaja hramadskaja arhanizacyja «Źviano/Łanka». Filmy buduć demanstravacca na ŭkrainskaj ci ruskaj movach, i ŭ zaležnaści ad movy filma buduć dastupnyja ŭkrainskija ci anhlijskija subtytry.
Kamientary