Źjaviŭsia sajt z hajdami pa biełaruskaj vyšyŭcy ad kłasnych majstrych
Prajekt cikavy jak dla navičkoŭ, jakija chočuć pahłybicca ŭ śviet narodnaj vyšyŭki, tak i dla majstrych, kab raskazać pra siabie i padzialicca ŭmieńniami.
Prajekt stvaryła Alaksandra Kurkova, zasnavalnica juvielirnaha brenda Belaruskicry, jaki staŭ viadomy dziakujučy kułonam z abrysami Biełarusi. Rychtujučy novuju kalekcyju, natchnionuju nacyjanalnym biełaruskim arnamientam, dziaŭčyna pahłybiłasia ŭ vyvučeńnie staražytnych simvałaŭ.
Alaksandra i jaje kamanda razmaŭlali z etnohrafami i sučasnymi majstrychami vyšyŭki. Vyvučeńnie ŭzoraŭ akazałasia zachaplalnaj pryhodaj, jakaja nieŭzabavie pierarasła ŭ novy prajekt.
Prajekt «Sučasnaja viečnaść. Vyšyŭka i ludzi, jakija jaje stvarajuć» abjadnoŭvaje amataraŭ vyšyŭki i historyi biełaruskaha stroju z roznych kutkoŭ śvietu. Resurs sabraŭ bazu majstrych, jakija nie tolki pracujuć ź biełaruskim nacyjanalnym kaściumam, ale i mohuć navučyć vałodać ihołkaj i pialcami ŭsich achvotnych.
«Šmat suajčyńnikaŭ, jakija robiać kłasnyja i važnyja rečy, raskidanyja pa ŭsim śviecie, i niama peŭnaha miesca, dzie ich možna sabrać. Tamu my vyrašyli abjadnać ich na našym resursie», — raskazvaje Alaksandra.
Ciapier u biblijatecy sajta sabrany akaŭnty siami ŭmielic. Naprykład, jość historyja śpiavački i viadučaj Kaciaryny Vadanosavaj, u čyim harderobie ŭžo niekalki pašytych ułasnaručna narodnych strojaŭ. I schiema vyšyŭki ad jaje — uzora «Pamiać».
Alena, dyzajnierka brenda «Łukina», najpierš pracuje ź pierapracavanymi materyjałami. Jana šukaje vintažnyja tkaniny, luksavaje nieaktualnaje adzieńnie albo reštki vytvorčaści i robić z hetaha novyja stylovyja rečy. Na sajcie «Sučasnaja viečnaść» dziaŭčyna padzialiłasia schiemaj «Kaciania».
A majstryca Nasta, jakaja žyvie ŭ Varšavie i zajmajecca svaim brendam adzieńnia i aksiesuaraŭ Kanva, prapanuje vyšyć schiemu «Pavuk».
Kožnaja z udzielnic pryŭnosić u prajekt čaścinku svajoj samabytnaści i ŭnikalnaha bačańnia biełaruskaha kulturnaha koda. U chutkim časie da dziaŭčat dadaducca novyja majstry:
«Heta žyvy resurs, kudy čałaviek moža adpravić svaju zajaŭku i takim čynam patrapić u bazu majstroŭ, u jakich možna pavučycca, kupić biełaruskuju simvoliku abo daviedacca što-niebudź pra jaje».
Cikava, što prajekt aryjentavany nie tolki na žančyn. Zasnavalnica tłumačyć:
«My vielmi čakali mužčyn, jakija zajmajucca kaściumam ci niečym, što źviazana ź Biełaruśsiu i biełaruskim arnamientam, ale pakul adhuknulisia tolki žančyny. Spadziajusia, što biblijateka budzie papaŭniacca i chutka da nas dałučacca i chłopcy».
Alaksandra ŭpeŭniena, što zaniatki vyšyŭkaj mohuć stać vydatnym instrumientam baraćby sa stresam.
«Pakul čałaviek nie pačnie vyšyvać, jon nie zrazumieje, nakolki heta kruta, nakolki heta začaravalny i cikavy praces. Ja dumaju, što vyšyŭka — heta naša biełaruskaja miedytacyja, tolki jana jašče i z sensam, bo praca zastajecca ŭ ciabie na rukach, z tvajoj enierhijaj».
Kab navičkam było zručniej spaścihać ramiastvo, Alaksandra płanuje zapuścić pryhožyja padarunkavyja karobki z usim nieabchodnym dla vyšyŭki (ihołkami, kanvoj, pialcami), a taksama pašyryć kolkaść prapanavanych schiem.
Čytajcie taksama: Juvielirny brend Belaruskicry prezientavaŭ kalekcyju abiarehaŭ
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary