«Hrupa hramadzian» Biełarusi polskaj nacyjanalnaści krytykuje Polšču i Borys
Siarod jahonych padpisantaŭ try rektary, niekalki bujnych menedžeraŭ i pradprymalnikaŭ.
31 etničny palak ź Biełarusi padpisaŭ zvarot da kiraŭnictva Polščy. U im jany zajaŭlajuć, što «biełaruskaja dziaržava nikoli nie parušała i nie parušaje pravoŭ hramadzianaŭ».«A.Borys i jaje nievialikaje atačeńnie nie ŭpaŭnavažany reprezentavać intaresy polskaj mienšaści», «jany dyskredytavali siabie parušeńniem zakonaŭ našaj dziaržavy».
Padpisanty źviartajucca z prośbaj «pryniać miery pa spynieńni razhułu falšu ŭ polskich medyjach». Jany vierać, «što spraviadlivaść i rozum voźmuć vierch i dyskryminacyjnaja palityka polskich uładaŭ što da svaim surodzičaŭ budzie spynienaja».
Jany prosiać taksama ab sustrečy z kiraŭnictvam Polščy.
Chto kankretna inicyjavaŭ zvarot, nie paviedamlajecca.
Siarod jahonych padpisantaŭ jość dva piensijanier, chatniaja haspadynia, try nastaŭniki, kiroŭca, a taksama deputat ad Hrodna rektar Hrodzienskaha ahrarnaha univiersiteta Vitold Pieścis, dyrektar «Hrodnaabłsajuzdruku» Tadevuš Vaŭčkievič, namieśnik dyrektara Homielskaj filii MTS Andrej Hradźvicki, namieśnik dyrektara Nacyjanalnaj biblijateki Stanisłaŭ Kaśpiarovič, dyrektar palihrafkambinata imia Jakuba Kołasa Hienadź Niahoćka, rektar Akademii mastactvaŭ Ryčard Smolski, rektar Bieraściejskaha univiersiteta Miečysłaŭ Časnoŭski.
Zaćvierdžany łukašenkaŭcami kiraŭnik Sajuza palakaŭ Stanisłaŭ Siamaška, jak i jaho papiarednik Juzaf Łučnik pad zvarotam nie fihurujuć.
U toj ža čas
častka padpisantaŭ nie ŭvachodziła ŭ Sajuz palakaŭ i nie mieła nijakich — ani prafiesijnych, ani siabroŭskich — kantaktaŭ miž saboj.Chtości pracuje ŭ kałhasie pad Bieraściem, chtości — u škole ŭ Pastavach, a chtości — na dziaržaŭnaj słužbie ŭ stalicy. Takoje ŭražańnie, što da etničnych palakaŭ źviartaŭsia niechta źvierchu pa admysłova składzienym śpisie.
Tekst zvarotu raspaŭsiudžany ahienctvam «Interfaks», viadomym svaimi krynicami infarmacyi ŭ śpiecsłužbach, a nie dziaržaŭnym ahienctvam BIEŁTA.
Vidać, u peŭnych strukturach uzhadali, jak savieckija hramadzianie habrejskaj nacyjanalnaści «dobraachvotna padpisvali» zvaroty z asudžeńniem mižnarodnaha sijanizmu. Hety vopyt vykarystany ŭ prapahandysckaj vajnie z Polščaj, razhornutaj vakoł Sajuza palakaŭ. Možna ŭjavić pačućci hramadzianaŭ, kali da ich źviartajucca z prośbaj «nie do odžucenia» pra padpisańnie padobnaha zvarotu.
Kamientary