Na World Press Photo pieramoh fatohraf-vajenkar TASS, jaki zdymaŭ zachop Maryupala. A voś što aburyła hruzinaŭ
Fatohraf rasijskaha dziaržaŭnaha ahienctva Michaił Ciareščanka zaniaŭ pryzavoje miesca z pracaj pad nazvaj «Pratesty ŭ Hruzii».
Fatohraf rasijskaha dziaržaŭnaha ahienctva TASS Michaił Ciareščanka staŭ adnym ź pieramožcaŭ konkursu World Press Photo ŭ naminacyi «Sieryja zdymkaŭ». Arhanizatary adznačyli jaho pracu «Pratesty ŭ Hruzii»: Ciareščanka zdymaŭ akcyi ŭ Tbilisi suprać prypynieńnia jeŭraintehracyi.
Pieramoha Ciareščanki vyklikała abureńnie siarod hruzinskich fotažurnalistaŭ. Jany apublikavali ŭ sacsietkach zvarot z krytykaj arhanizataraŭ konkursu, piša «Mieduza».
«Uznaharodžańnie fatohrafa, jaki padtrymlivaje pazicyju Kramla, za aśviatleńnie antyrasijskich pratestaŭ — nie tolki hłyboka supiarečlivaje, ale i źjaŭlajecca pramoj źniavahaj dla tych, chto ryzykuje svaim žyćciom, vystupajučy suprać umiašańnia Rasii ŭ suvierenitet i budučyniu Hruzii», — havorycca ŭ zajavie.
Fotažurnalisty nahadali, što ahienctva TASS adyhryvała klučavuju rolu ŭ prapahandzie vajny 2008 hoda i aktyŭna pradstaŭlała Hruziju ŭ jakaści dziaržavy-ahresara.
«Jak hramadzianie Hruzii, krainy, 20% terytoryi jakoj akupavana Rasijaj, my majem niepasredny dośvied vajny, vymušanaha pieramiaščeńnia i padryvu našaha suvierenitetu. Pratestoŭcy na ŭznaharodžanaj sieryi vystupajuć suprać sił, jakija TASS paśladoŭna abaraniaje. Raskazvać ich historyju praz ahienctva, jakoje saŭdzielničaje ŭ ich ucisku, — heta nie tolki supiarečliva, heta zdrada asnovatvornym pryncypam žurnalistyki», — padkreślili hruzinskija žurnalisty.
Ciareščanka ŭvachodzić u prezidencki puł, a TASS taksama nazyvaje jaho vajennym karespandentam. U intervju z nahody pieramohi ŭ konkursie jon raskazaŭ, što ŭ 2022 hodzie zdymaŭ zachop Maryupala rasijskimi vojskami — i nazyvaje heta «vyzvaleńniem».
«Heta była aktyŭnaja faza vyzvaleńnia horada-miljońnika, vajennyja prasoŭvalisia, i my, žurnalisty, razam ź imi», — raspavioŭ Ciareščanka.
Nahadajem, u katehoryi «Doŭhaterminovy prajekt» u hetym hodzie na World Press Photo pieramahła biełaruska Taćciana Čypsanava. Jana raspaviadaje pra narod nhai tachu, jaki žyvie ŭ pryrodaachoŭnym rehijonie Te Ureviera ŭ Novaj Ziełandyi.
Konkurs World Press Photo ładzić niezaležnaja arhanizacyja sa štab-kvateraj u Amsterdamie.
Ciapier čytajuć
«Jość u Biełarusi ludzi, jakim nie padabajecca rasijski ściah, saviecki ściah». Rasijaninu na BMW Ch7 ź niamieckimi numarami paškodzili aŭto ŭ Minsku12
Kamientary