Piać «hlancavych» hmachaŭ uźviali ŭ hihanckim kvartale na poŭdni stalicy. Start budaŭnictvu dali jašče ŭ 2021 hodzie.
Płošča škleńnia ŭsich piaci viežaŭ składaje kala 50 tys. kv. m, heta 60 pracentaŭ prac. Pavodle słoŭ dyrektara «Dana Astry» Pietara Pietrava, siońnia na abjekcie 400 čałaviek paralelna vykonvajuć raboty jak unutry, tak i zvonku budynkaŭ, pišuć Minsk-naviny.
— Raniej u nas uźnikali ciažkaści z pastaŭkami fasadnych modulaŭ. Zaraz situacyja vypraŭlajecca, — zapeŭniŭ Pietraŭ. — My całkam zabiaśpiečany finansavańniem i materyjałami. Na nastupnym tydni płanujem prystupić da mantažu fasadu, a da kanca leta majem namier całkam zaviaršyć praces škleńnia.
Pavodle słoŭ inviestara, vyšynia 42‑paviarchovaj centralnaj viežy Mižnarodnaha finansavaha centru, dzie i budzie skancentravana asnoŭnaja masa štab-kvater zamiežnych i ajčynnych biznesaŭ, razam z padziemnaj častkaj składaje 210 m.
Ekskluzivam centralnaj viežy taksama stanuć restaran i aharodžanaja ahladnaja placoŭka na dachu. Na «niaŭličanym» 43‑m paviersie — viertalotnaja placoŭka. Dapamahać pieraadolvać takuju vyšyniu naviedvalnikam buduć 13 liftaŭ.
Užo viadoma, što ŭ hałoŭnym chmaračosie budzie adkryty SPA-centr. Viaducca pieramovy z adnoj ź viadomych sietak.
U dvuch 26‑paviarchovych i dvuch 14‑paviarchovych viežach raźmieściacca biźnies-apartamienty ahulnaj płoščaj kala 28 tys. kv. m. Kožny chmaračos buduć uvodzić u ekspłuatacyju pa miery hatoŭnaści.
Z ulikam značnaści abjekta na vyjaznoj naradzie Eduard Tamilčyk asablivuju ŭvahu akcentavaŭ na kultury budaŭnictva i terminach zaviaršeńnia rabot.
— Kali zavieršacca raboty pa škleńni ŭsich piaci viežaŭ, abjekt «zahraje» i budzie radavać svaim vyhladam minčan i haściej stalicy, — adznačyŭ jon.
Pad ziamloj usie piać viežaŭ abjadnaje parkinh na 584 mašyna-miescy.
Kamientary