Haračaja linija ź Biełaruśsiu pa linii armii pracuje niezaležna ad palityki — kamandujučy US Litvy
«Heta ni ŭ jakim razie nie aznačaje, što my telefanujem jak pryjacieli i pytajemsia, što ty jeŭ na viačeru ci jak pravioŭ vychadnyja».
Hałoŭnakamandujučy Uzbrojenymi siłami Litvy Rajmundas Vajkšnoras raspavioŭ, što tak zvanaja haračaja linija ź Biełaruśsiu funkcyjanuje niezaležna ad palityčnaj situacyi, adnak heta nie aznačaje padtrymańnia pastajannaj suviazi ź Minskam.
«Niavažna, jakaja palityčnaja situacyja, haračaja linija ŭsio roŭna zachoŭvajecca. Tak, niejki čas jana była nieaktyŭnaja, ale kali adbyvajucca padobnyja incydenty, jak minułahodni prylot «Hierbiery», zaraz isnuje niebiaśpieka prylotu taho ci inšaha abjekta prosta tamu, što idzie vajna va Ukrainie», — skazaŭ Vajkšnoras u efiry radyjo LRT.
«Takija haračyja linii nieabchodnyja. Ci vykarystoŭvajucca jany aktyŭna, ci nie, ale ŭ padobnych situacyjach jany dapamahajuć paźbiehnuć nieparazumieńniaŭ. Mienavita na techničnym uzroŭni. Heta ni ŭ jakim razie nie aznačaje, što my telefanujem jak pryjacieli i pytajemsia, što ty jeŭ na viačeru ci jak pravioŭ vychadnyja», — adznačyŭ jon.
Kamandujučy litoŭskaj armijaj zrabiŭ hetuju zajavu paśla taho, jak u sieradu pavietranuju prastoru Litvy parušyŭ bieśpiłotnik, u vyniku čaho va ŭschodniaj častcy krainy prykładna na dźvie hadziny była abvieščana pavietranaja tryvoha.
Kamandujučy Suchaputnymi vojskami Niaryjus Stankievičus raniej paviedamiŭ, što pra mierkavany bieśpiłotnik, jaki lacieŭ u bok Litvy, prainfarmavała Biełaruś. Heta supała z dadzienymi radaraŭ litoŭskaj i łatvijskaj armij, paśla čaho była zadziejničana pavietranaja palicyja NATA.
«Spačatku byŭ zvanok ad apieratyŭnaha dziažurnaha našych Vajskova-pavietranych sił. Viadoma, jak zaŭsiody, jany [Biełaruś] spačatku ŭsio admaŭlali, ale kali, vidać, nie zastałosia inšaha vyjścia, pieratelefanavali i paviedamili pra ryzyku zalotu na našu terytoryju», — skazaŭ Vajkšnoras.
Pavodle słoŭ hałoŭnakamandujučaha, Litva, Łatvija i sajuźniki pa NATA da hetaha nazirali na radarach nievyraznuju aktyŭnaść na terytoryi Biełarusi, jakaja pakazvała na toje,
što «biełarusy sami sprabavali niejkimi dziejańniami niejtralizavać abo pierachapić abjekty».
U čaćvier litoŭskija vajskoŭcy adnavili pierapynienyja z nadychodam ciemry pošuki drona.
Ciapier čytajuć
Prapahandysty pakazali mocna schudniełaha Vasila Vieramiejčyka13
Kamientary