Kańje Uest sabraŭ 118 tysiač čałaviek na kancercie ŭ Stambule. Kaža, heta samy vialiki stadyjonny kancert u historyi
Vystupy hetaha skandalnaha repiera admianili ŭ niekalkich krainach z-za jaho antysiemickich vykazvańniaŭ i pachvalby Hitleru.
Amierykanski repier Kańje Uest, taksama viadomy jak Ye, sabraŭ 118 tysiač fanataŭ na kancercie ŭ Stambule 30 maja, paviedamiła tureckaje dziaržaŭnaje ahienctva Anadolu.
Siarod hledačoŭ byli fanaty ź Vialikabrytanii, Hiermanii, Francyi, Niderłandaŭ, Italii, Rasii, Polščy i Blizkaha Uschodu.
Hety pieršy kancert repiera ŭ Jeŭropie z 2014 hoda i pieršy ŭ Turcyi.
«Ja prosta chaču skazać usim vam, my tolki što pabili rekord, 118 tysiač, najbujniejšy stadyjonny vystup usich časoŭ», — skazaŭ Uest na kancercie.
Uest hetym letam sutyknuŭsia z chvalaj admien kancertaŭ pa ŭsioj Jeŭropie paśla šmathadovych antysiemickich zaŭvah, uklučajučy vykazvańni z pachvałoj Adolfa Hitlera i vypusk kantentu z vykarystańniem nacysckaj simvoliki, piša Reuters. Naprykład, jaho krytykavali za reliz «Heil Hitler».
Kancerty Kańje Uesta admianili ŭ Vialikabrytanii, Niderłandach, Polščy.
U studzieni repier raźmiaściŭ rekłamu na poŭnuju staronku ŭ Wall Street Journal, u jakoj adroksia ad svajho minułaha zachapleńnia Hitleram i paprasiŭ prabačeńnia za svaje pavodziny, jakija jon źviazaŭ ź niedyjahnastavanaj traŭmaj hałaŭnoha mozha i nievylečanym bipalarnym rasstrojstvam.
Razam z tym kamiercyjny pośpiech Uesta nievierahodny. Jaho apošni studyjny albom Bully debiutavaŭ na 1‑m miescy ŭ čarcie Top R&B/Hip-Hop Albums adrazu paśla svajho relizu ŭ pačatku hetaha hoda. Repier maje 24 premii «Hremi» i 10 albomaŭ, jakija zajmali 1‑ie miesca ŭ Billboard 200, što robić jaho adnym z samych tytułavanych artystaŭ u historyi čartaŭ, piša Billboard.
Kamientary
nu niejak ža była ŭpała na čyjuści mašynu... kapot u śmiatku... dobra, što muž byŭ pobač - ahledzieŭ kapot potym azirnuŭsia pa bakach skazaŭ - nu ty daješ... ale nichto nie bačyŭ, tamu chucieńka biažym adsiul