Mitrapalita Iłaryjona, u mašynie jakoha znajšli bieły parašok, Maskva pieraviała z Čechii ŭ brazilskaje zachałuście
Patryjarch Maskoŭski i ŭsioj Rusi Kirył vyznačyŭ novaje miesca słužby dla mitrapalita Iłaryjona (Ałfiejeva). Jaho adpravili ŭ Arhiencinska-Paŭdniovaamierykanskuju jeparchiju.
Adpaviedny ŭkaz patryjarcha źjaviŭsia na aficyjnym sajcie RPC. Zhodna z dakumientam, ijerarchu zahadana pastajanna znachodzicca ŭ Brazilii. Miescami jaho słužby vyznačany chram śviatych apostałaŭ Piatra i Paŭła ŭ horadzie Santa-Roza i chram śviatoha apostała i jevanhielista Jana Bahasłova ŭ horadzie Kampina-das-Misojns.
U paviedamleńni Patryjarchatu adznačajecca, što mitrapalit Iłaryjon «z abjektyŭnych abstavin» nie moža słužyć u Karłavych Varach, tamu jaho nakiroŭvajuć u Arhientynska-paŭdniovaamierykanskuju jeparchiju.
Hetamu rašeńniu papiaredničaŭ hučny skandał u Jeŭropie.
Ijerarcha RPC zatrymali ŭ niadzielu 24 traŭnia ŭ Čechii — u jaho mašynie byli vyjaŭlenyja «kantejniery ź biełym rečyvam».
Rasijski bok zapatrabavaŭ «nieadkładnaha vyzvaleńnia» mitrapalita i spynieńnia «hanieńniaŭ na pradstaŭnikoŭ RPC u Čechii».
30 maja mitrapalit Iłaryjon viarnuŭsia ŭ Rasiju. Ciapier zamiest jeŭrapiejskich parafij rasijskamu ijerarchu daviadziecca słužyć u Paŭdniovaj Amierycy.
Chto taki mitrapalit Iłaryjon?
U minułym Iłaryjon (Ałfiejeŭ) byŭ kiraŭnikom Adździeła zamiežnych carkoŭnych suviaziaŭ Maskoŭskaha patryjarchatu i ličyŭsia adnym z samych nabližanych da patryjarcha Kiryła ludziej. U 2022 hodzie jaho pryznačyli kiraŭnikom Budapiešckaj jeparchii RPC.
Adnak paśla hučnaha skandału, źviazanaha z abvinavačańniami ŭ damahalnictvach, Iłaryjon byŭ adpraŭleny ŭ chram śviatych Piatra i Paŭła ŭ znakamitym kurortnym horadzie Karłavy Vary, dzie pražyvaje vialikaja rasijskaja dyjaspara.
Kamientary