Jak vyhladajuć kapsuły dla vyžyvańnia padčas vojnaŭ i stychijnych biedstvaŭ
Jany raźličanyja na dvuch-čatyroch darosłych.
Hieapalityčnaja niestabilnaść, anamalnyja pryrodnyja źjavy i ryzyki technahiennych katastrof prymušajuć usio bolš ludziej zadumvacca pra ŭłasnuju biaśpieku. Francuzski startap prapanuje rašeńnie ŭ vyhladzie mabilnych kapsuł, pryznačanych dla vyžyvańnia ŭ ekstremalnych umovach.
Prajekt pad nazvaj LifePods, raspracavany kampanijaj Momentum Technologies, byŭ prezientavany na mižnarodnych vystavach VivaTech i Eurosatory. Jak adznačaje New Atlas, asnoŭnaja ideja raspracoŭščykaŭ zaklučajecca ŭ tym, kab pieratvaryć składany praces stvareńnia schovišča ŭ dastupnuju pasłuhu: zamiest kapitalnaha budaŭnictva padziemnych bunkieraŭ spažyŭcam prapanujuć hatovyja aŭtanomnyja moduli. Takija kapsuły lohka transpartavać: jany źmiaščajucca ŭ standartnych hruzavych kantejnierach, mohuć zachoŭvacca štabielami, a pry nieabchodnaści — dastaŭlacca viertalotami ŭ ciažkadastupnyja miaściny.
Jak adznačajuć u kampanii, raspracoŭka aryjentavanaja na toje, kab harantavać biaśpieku va ŭmovach technahiennych katastrof, uzbrojenych kanfliktaŭ i pryrodnych kataklizmaŭ, kali tradycyjnaja infrastruktura i słužby vyratavańnia stanoviacca niedastupnymi.
Na hetym etapie startap prapanuje dźvie śpiecyjalizavanyja madeli. Naziemnaja kapsuła B-01 raźličanaja na dvuch čałaviek i stvoranaja dla abarony ad kul, vybuchaŭ i pažaraŭ.
Pavodle zajavy vytvorcy, vykarystanyja materyjały ŭžo prajšli balistyčnyja vyprabavańni na adpaviednaść mižnarodnamu standartu VPAM PM7. Heta aznačaje zdolnaść vytrymlivać traplańnie kuli kalibru 5,56x45 mm na chutkaści 950 m/s i kuli kalibru 7,62x51 mm na chutkaści 830 m/s. Akramia balistyčnaj abarony, modul maje śpiecyjalnuju izalacyju. Poŭnaja siertyfikacyja ŭsioj kapsuły jak adzinaj sistemy pavinna adbycca ŭ bližejšy čas.
Dla abarony ad vodnych kataklizmaŭ, takich jak cunami ci pavodki, pryznačanaja madel W-01. Jana moža źmiaścić čatyroch darosłych i čatyroch dziaciej. Praŭda, dzieci pavinny znachodzicca na kaleniach u darosłych.
Kanstruktary admovilisia ad vykarystańnia ruchavikoŭ abo składanych miechanizmaŭ na karyść pasiŭnaj hidradynamičnaj ustojlivaści. Modul pavinien zachoŭvać stabilnaść na vadzie padčas cunami ci maštabnych pavodak za košt svajoj formy i raźmierkavańnia vahi. Papiarednija testy na płyvučaść pakazali stanoŭčyja vyniki, adnak poŭnyja danyja niezaležnych ekśpiertyz pakul nie apublikavanyja.
Košt takich modulaŭ vahajecca ad 29 000 da 40 000 jeŭra ŭ zaležnaści ad madeli i kamplektacyi. Pry hetym za dastaŭku i mantaž nieabchodna zapłacić asobna.
Choć takija kapsuły mohuć zacikavić i pryvatnych pakupnikoŭ, asnoŭnymi patencyjnymi klijentami LifePods u kampanii bačać dziaržaŭnyja struktury i arhanizacyi, adkaznyja za zachavańnie krytyčnaj infrastruktury.
Kampanija taksama pracuje nad treciaj madellu — Q-01, pryznačanaj dla abarony padčas mocnych ziemlatrusaŭ.
Kapsuła masaj kala 550 kiłahramaŭ maje ŭzmocnienuju razbornuju kanstrukcyju i raźličanaja na ŭstanoŭku ŭ šmatkvaternych damach vyšynioj da šaści pavierchaŭ, jakija, pavodle raspracoŭščykaŭ, składajuć kala 80% zabudovy ŭ siejsmaniebiaśpiečnych rehijonach śvietu. Zaviaršyć raspracoŭku Q-01 kampanija raźličvaje da kanca 2026 hoda, a vyprabavańni pačać u 2027-m. Pavodle papiarednich acenak, takaja kapsuła budzie kaštavać kala 18 tysiač jeŭra.
Startap užo zaviaršyŭ pieršyja raŭndy finansavańnia i płanuje pryciahnuć novyja inviestycyi ŭ kancy 2026 — pačatku 2027 hoda. Hetyja srodki patrebnyja dla siertyfikacyi, padrychtoŭki vytvorčaści i vychadu kapsuł na rynak. Pośpiech prajekta budzie zaležać najpierš ad taho, ci projduć LifePods finalnyja vyprabavańni jak paŭnavartasnyja sistemy, a nie tolki jak asobnyja elemienty.
Kamientary