U postapakaliptyčnym viesternie Guns of Eschaton budzie biełaruskaja mova. Łakalizacyju prafinansavali dva biełarusy
Adbyŭsia aficyjny anons novaha šutara Guns of Eschaton, nad vizualnym stylem jakoha pracavaŭ mastak kultavych hulniaŭ Half-Life 2 i Dishonored. Adnoj z hałoŭnych admietnaściej relizu stanie poŭnaja biełaruskaja łakalizacyja, jakuju za ŭłasnyja srodki inicyjavali i apłacili dva biełarusy, kab padtrymać rodnuju movu ŭ suśvietnaj industryi.
Jak raskazaŭ na svajoj staroncy ŭ LinkedIn dyrektar pa pradukcie studyi Eschatology Entertainment Alaksiej Hierasimovič, ideja dadać biełaruskuju movu i jaje finansavańnie naležać jamu asabista, a taksama zasnavalniku studyi pierakładaŭ Riotloc Uładzimiru Kanaplickamu. Kab pierakład nie byŭ zrobleny dla ptušački, da pracy pryciahnuli prafiesijanałaŭ, jakija zabiaśpiečyli vysokuju litaraturnuju jakaść tekstu. U vyniku ź pieršaha dnia relizu ŭvieś interfiejs i ŭsie dyjałohi buduć dastupnyja pa-biełarusku.
Pa słovach Hierasimoviča, z kamiercyjnaha punkta hledžańnia dadavać biełaruskuju movu ŭ hulni nie zaŭsiody metazhodna, bo aŭdytoryja adnosna nievialikaja. Adnak mienavita tamu vielmi važna, kab jana źjaŭlałasia ŭ novych prajektach.
Jon adznačyŭ, što apošnim časam studyi ź biełaruskimi karaniami ŭsio čaściej dadajuć rodnuju movu ŭ svaje relizy, pryvioŭšy ŭ prykład hulni Hollywood Animal i Replaced.
Raspracoŭkaj Guns of Eschaton zajmajecca kiprskaja studyja Eschatology Entertainment pry padtrymcy vydaŭca 4Divinity. Sam prajekt ujaŭlaje saboj šutar ad pieršaj asoby z elemientami žanru soulslike.
Siužet pieranosić hulcoŭ u alternatyŭnuju viersiju Dzikaha Zachadu, jaki pahłynuŭ mistyčny apakalipsis. Hałoŭny hieroj — zvyčajny strałok, jaki sprabuje vyžyć i viarnucca dadomu z dapamohaj kolta i ŭłasnych instynktaŭ.
Stvaralniki abiacajuć składany hiejmpłej: hulcam daviadziecca vyvučać pavodziny vorahaŭ, padbirać dla ich peŭnyja typy kul i staranna ekanomić bojeprypasy. U arsienale budzie bolš za 20 vidaŭ zbroi na asnovie realnych pratatypaŭ XIX stahodździa. Hulniu možna budzie prajści jak u adzinočku, tak i ŭ kaapieratyŭnym režymie, taksama zajaŭleny farmat PvP-bitvaŭ.
Varta asobna adznačyć, što studyja Eschatology Entertainment była zasnavanaja pry ŭdziele lehiendarnaha art-dyrektara Viktara Antonava, jaki niadaŭna pajšoŭ z žyćcia. Jon udzielničaŭ u stvareńni Guns of Eschaton z samych rańnich etapaŭ i sfarmiravaŭ unikalny vizualny styl prajekta.
Reliz hulni zapłanavany na PC (Steam), PlayStation 5 i Xbox Series X/S, adnak dakładnaja data vychadu pakul nie nazyvajecca.
«Naša Niva» — bastyjon biełaruščyny
PADTRYMAĆ
Kamientary
Pry usioj majoj pavazie da kłopatu vytvorcaŭ hulniaŭ da svajoj kišeni, nie baču nahody dla pychi.