Čamu futbalisty ŭsio čaściej vychodziać na pole ŭ «spartyŭnych biusthaltarach»?
Adnoj ź niečakanych tem dla abmierkavańnia padčas sioletniaha čempijanatu śvietu pa futbole stali čornyja topy, jakija mnohija hulcy nosiać pad majkami. Dla čaho jany patrebnyja, tłumačyć The New York Post.
Tyja, chto sočyć za matčami sioletniaha čempijanatu śvietu pa futbole, napeŭna źviarnuli ŭvahu na čornyja ełastyčnyja topy, jakija mnohija hulcy nosiać pad futbołkami. U sacsietkach ich navat žartaŭliva nazyvali mužčynskimi spartyŭnymi biusthaltarami. Ale sapraŭdnaje pryznačeńnie hetaj ekipiroŭki akazałasia zusim inšym.
Nasamreč heta śpiecyjalnyja kamizelki z GPS-modulami i inšymi datčykami, jakimi siońnia karystajecca bolšaść prafiesijnych futbolnych kamand. Ich vyrablajuć kampanii, što śpiecyjalizujucca na spartyŭnych technałohijach, a siarod karystalnikaŭ — nacyjanalnyja zbornyja i viadučyja kłuby. Naprykład, usia mužčynskaja zbornaja Brazilii vykarystoŭvaje takija pryłady.
Dyzajn, jaki nahadvaje karotki top, vybrany vyklučna z praktyčnych mierkavańniaŭ. U vierchniaj častcy kamizelki pamiž łapatkami zamacoŭvajecca nievialiki modul. Mienavita hetaje miesca ličycca najbolš prydatnym: adsiul lepš prymajecca sihnał sa spadarožnikaŭ, datčyk mienš padviarhajecca zrušeńniam padčas biehu i nie stvaraje dadatkovaj niebiaśpieki pry sutyknieńniach na poli.
Takija sistemy źbirajuć vialikuju kolkaść danych pra kožnaha hulca. Jany fiksujuć chutkaść, projdzienuju adlehłaść, kolkaść paskareńniaŭ i tarmažeńniaŭ, intensiŭnaść nahruzki i inšyja paramietry padčas trenirovak i matčaŭ. U adroźnieńnie ad biehunoŭ futbalisty pastajanna rezka źmianiajuć kirunak ruchu, paskarajucca, tarmoziać i ŭstupajuć u adzinaborstvy, tamu sistema raspracavana tak, kab dakładna fiksavać mienavita takija vybuchovyja nahruzki.
Na asnovie hetaj infarmacyi z dapamohaj śpiecyjalizavanaha prahramnaha zabieśpiačeńnia treniery, daktary i śpiecyjalisty pa fizičnaj padrychtoŭcy mohuć indyvidualna płanavać treniroŭki, aceńvać stomlenaść futbalistaŭ i kantralavać ich adnaŭleńnie paśla traŭmaŭ. Heta dazvalaje padbirać nahruzki dla kožnaha hulca asobna, a nie treniravać usiu kamandu pavodle adnaho šabłonu.
Naprykład, hulec moža ličyć, što ŭžo całkam adnaviŭsia paśla paškodžańnia, ale danyja pakazvajuć, što jon usio jašče nie raźvivaje svaju zvyčajnuju maksimalnuju chutkaść abo nieśviadoma pieranosić nahruzku na zdarovuju nahu. U takim vypadku viartańnie da poŭnych trenirovak mohuć adkłaści, kab źmienšyć ryzyku paŭtornaj traŭmy.
Efiektyŭnaść takich pryład paćviardžajuć i navukovyja daśledavańni. Ahlad, apublikavany ŭ 2023 hodzie ŭ časopisie BMC Sports Science, Medicine and Rehabilitation, pakazaŭ, što datčyki dapamahajuć aceńvać uzrovień stomlenaści, płanavać adnaŭleńnie paśla nahruzak i traŭm, a taksama svoječasova zaŭvažać prykmiety pierahruzki, jakija mohuć pryvieści da paškodžańniaŭ, asabliva kaleniaŭ i ščykałatak.
Adnak navat samyja sučasnyja technałohii nie zdolnyja acanić usio, što adbyvajecca na futbolnym poli.
Pra taki vypadak žurnalistam raskazali ŭ štabie zbornaj Brazilii. Adzin z futbalistaŭ pavodle GPS-statystyki vyhladaŭ značna mienš aktyŭnym za partnioraŭ: za matč jon prabiahaŭ prykładna ŭdvaja mienšuju dystancyju. Adnak vyśvietliłasia, što hulcu prosta nie treba było šmat biehać — dziakujučy pravilnamu vybaru pazicyi jon amal zaŭsiody apynaŭsia mienavita tam, dzie byŭ patrebny kamandzie.
Hety vypadak pakazvaje hałoŭnaje abmiežavańnie takich sistem. Jany mohuć vielmi dakładna vymiarać fizičnyja pakazčyki futbalistaŭ, ale pakul nie zdolnyja acanić umieńnie čytać hulniu, vybirać pravilnuju pazicyju, bačyć raźvićcio ataki ci prajaŭlać lidarskija jakaści.
Ciapier čytajuć
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać1919
Kamientary