Łukašenka admoviŭsia padpisvać Płan užyćcia rehijanalnaj hrupoŭki vojskaŭ Biełarusi i Rasii
Jon zapatrabavaŭ biaspłatnych pastavak uzbrajeńniaŭ i abmierkavańnia płana z kiraŭnictvam Rasii.
Jon zapatrabavaŭ biaspłatnych pastavak uzbrajeńniaŭ i abmierkavańnia płana z kiraŭnictvam Rasii.
Rašeńnie ab prymianieńni rehijanalnaj hrupoŭki vojskaŭ (sił) Biełarusi i Rasii pavinna prymacca na ŭzroŭni vyšejšaj dziaržrady sajuznaj dziaržavy. Ab hetym zajaviŭ Alaksandr Łukašenka 22 listapada, zasłuchoŭvajučy dakład ab novym Płanie prymianieńnia RHV(S). Padpisvać jaho ŭ pracoŭnym paradku jon admoviŭsia.
«Nijakija dakumienty ŭ pracoŭnym paradku ja padpisvać nie budu. Tak i pieradajcie ministru abarony i prezidentu Rasii, — cytuje Alaksandra Łukašenku dziaržaŭnaje ahienctva BiełTA. — Jość VDR, voś jon źbiarecca — my razhledzim hety płan. A siońnia vy pavinny mianie prainfarmavać. Ja viedaju, što moj rasijski kaleha razhladaŭ hety płan, jany zhadzilisia ź im. Ciapier my jaho razhledzim, a na najbližejšym pasiadžeńni VDR zaćvierdzim. Heta budzie pravilna. Chavać nam tut niama čaho, my adkrytyja dla miru. Dumaju, Rasija taksama nie źbirajecca štości chavać».
Alaksandr Łukašenka zajaviŭ, što Rasija pavinna dapamahać Biełarusi ŭ arhanizacyi biaśpieki. «My, kaniešnie, budziem vykonvać svaje funkcyi, ale my ich možam vykonvać tolki pry padtrymcy Rasii, nu chacia b uzbrajeńniem, — skazaŭ prezident. —
Heta nie padychod, kali nam časam prapanoŭvajuć kuplać uzbrajeńnie za svoj košt, dy jašče pa rynačnaj, jak jany ŭmiejuć havaryć, canie».
Nahadajem, rehijanalnaja hrupoŭka vojskaŭ uzbrojenych sił Biełarusi i Rasii była stvoranaja ŭ 1999–2000 hadach. Jana zaklikanaja arhanizoŭvać vajennuju biaśpieku Biełarusi i sumiežnych ź joj abłaściej Rasii, a taksama Kalininhradskaj vobłaści i akvatoryi Bałtyjskaha mora. Kolkaść hrupoŭki składaje kala 300 tysiač vajennasłužačych.
U pahadnieńni pamiž Biełaruśsiu i Rasijaj ab sumiesnaj arhanizacyi rehijanalnaj biaśpieki ŭ vajennaj śfiery, jakoje nabyło moc u mai 1999 hoda, «rehijanalnaja hrupoŭka vojskaŭ (sił)» vyznačanaja jak «raźmieščanyja ŭ mirny čas abo razhornutyja ŭ pahražalny pieryjad u rehijonie dla adbicca mahčymaj ahresii orhany kiravańnia i vojski (siły) Uzbrojenych sił Respubliki Biełaruś i Uzbrojenych sił Rasijskaj Fiederacyi, a taksama inšyja vajskovyja farmavańni bakoŭ, spłanavanyja da prymianieńnia pa adzinaj zadumie i płanu».
Kamientary