CVK: Usio vyrašaje Biełteleradyjokampanija.
Centrvybarkam admoviŭ apazicyjnym kandydatam u prezidenty Biełarusi ŭ pradastaŭleńni dadatkovaha teleefiru. Takoje rašeńnie pryniata na pasiadžeńni CVK 9 śniežnia.
Nahadajem, sumiesnaja zajava Uładzimira Niaklajeva i Andreja Sańnikava ab pradastaŭleńni dadatkovaha teleefiru było pieradadziena ŭ CVK ranicaj 7 śniežnia padčas pikietu, arhanizavanaha aktyvistami hramadzianskich kampanijaŭ «Jeŭrapiejskaja Biełaruś» i «Havary praŭdu!».
Prymajučy zajavy, sakratar CVK Mikałaj Łazavik zajaviŭ, što pytańnie
ab vydzialeńni dadatkovaha efirnaha času znachodzicca ŭ kampietencyi Biełteleradyjokampanii, a CVK moža tolki rekamiendavać zrabić heta.
Jak zaznačyła siońnia na pasiadžeńni Taćciana Proćka, člen CVK z pravam daradčaha hołasu ad kandydata Niaklajeva, farmat prajšoŭšych televystupleńniaŭ nie dazvoliŭ alternatyŭnym kandydatam u poŭnaj miery raspavieści pra svaje prahramy. Razam z tym Alaksandr Łukašenka raskazvaŭ pra svaju prahramu faktyčna dva dni, vystupajučy na Usiebiełaruskim narodnym schodzie.
Jašče adzin člen CVK z pravam daradčaha hołasu ad Niaklajeva, Juryj Chadyka, zajaviŭ: u intaresach Centrvybarkama i ŭsiaho biełaruskaha naroda dać mahčymaść jak maha bolš poŭna aznajomicca z pazicyjami kandydataŭ u prezidenty.
Členy CVK z pravam daradčaha hołasu ad kandydataŭ Viktara Ciareščanki, Jarasłava Ramančuka i Ryhora Kastusiova paviedamili, što nazvanyja kandydaty taksama ličać nieabchodnym vydzielić im dla vystupleńnia dadatkovy efir.
U svaju čarhu sakratar CVK adznačyŭ:
"My nakiravali zapyt u Biełteleradyjokampaniju. Tam adkazali, što svaje abaviazki jany vykanali, paraiŭšy kandydatam źviarnucca ŭ struktury, jakija nie ŭvachodziać u Biełteleradyjokampaniju".
Łazavik taksama paviedamiŭ, što ŭ CVK pastupili zajavy ab raspaŭsiudžańni kandydatam Niaklajevym u efiry 3 śniežnia niesapraŭdnych źviestak u dačynieńni da kiraŭnictva Połackaha i Babrujskaha vykankamaŭ.
Aprača taho, sakratar CVK źviarnuŭ uvahu na toje, što ŭ svaich televystupleńniach kandydaty zaklikali hramadzian pryjści na płošču. "Ja suprać taho, kab hučali zakliki da supraćpraŭnych dziejańniaŭ", — zajaviŭ Łazavik.
Jaho pazicyju padtrymali inšyja členy CVK.
U vyniku kamisija adnahałosna prahałasavała suprać vydzialeńnia kandydatam dadatkovaha teleefiru.
Kamientary