Z červienia pa žnivień mižnarodny aeraport Pałanhi płanuje dvojčy na tydzień prymać samaloty z turystami z Rasii i Biełarusi. Prynamsi, pra toje, što viaducca takija pieramovy,
nternet-partału DELFI paviedamiła dyrektar aeraporta Jołanta Juciavičute.
Kančatkovaje rašeńnie jašče nie pryniata -- u hety momant pačaty pieramovy ź niekalkimi avijakampanijami, jakija mahli b lotać pa maršrucie Maskva - Pałanha. «Što da Minska, to ŭ Biełarusi dziejničaje dziaržaŭnaja avijakampanija, jakoj patrebna jasnaść u pytańni patoku turystaŭ, kab pryniać rašeńnie», - kaža Juciavičute.
Tym časam biełaruski nacyjanalny avijapieravozčyk «Biełavija» pakul nie płanuje dadavać u letni raskład pramy rejs pamiž Minskam i Pałanhaj.
Pry hetym u avijakampanii padkreślili, što hatovyja vykonvać paloty pa maršrucie, kali turystyčnyja kampanii zamoviać čartarny rejs. Niahledziačy na blizkaść litoŭskaha kurorta da biełaruskaj stalicy, pramych transpartnych znosin miž haradami niama, tak što avijarejs całkam zmoža stać zapatrabavanym - u pieršuju čarhu ŭ mierkavańniach vyhady.
Zrešty, u kampanijach, jakija śpiecyjalizujucca na litoŭskim napramku,
sumniajucca, što turystaŭ zacikavić pavietranyja znosiny z prybałtyjskim kurortam.
«Viadoma, Pałanha -- heta letniaja stalica Litvy, dzie štohod adpačyvaje vialikaja kolkaść biełarusaŭ, - kaža Alaksiej Ciarenćjeŭ, dyrektar turystyčnaha ahienctva «Hultaj» (Lentiaj). - Adnak ja zusim nie peŭny, što rejs budzie zapatrabavany. Kali taki rejs ŭsio ž źjavicca i budzie ažyćciaŭlacca z Nacyjanalnaha aeraporta «Minsk», to čas pajezdki z ulikam darohi da aeraporta, rehistracyi na rejs, samoha palotu i atrymańnia bahažu składzie nijak nie mienš za čatyry hadziny. Našy turysty aŭtobusam dabirajucca da Pałanhi kala vaśmi hadzin, ułasnym aŭtamabilem -- šeść ci siem, u zaležnaści ad času, vydatkavanaha na prachodžańnie miažy. Pry hetym prajezd dla našych turystaŭ u abodva baki abychodzicca ŭ 55 jeŭra, a kali niekalki hadoŭ tamu raźličyli košt pieralotu Minsk - Pałanha, atrymałasia, što jaho košt składaje prykładna 150 jeŭra. Naŭrad ci biełaruskija turysty buduć pierapłačvać».
Kamientary