Rabočyja «Hranita» admovilisia pracavać u śviata

Nie dapamahli ni ŭhavory, ni pahrozy. Niekatoryja rabotniki kažuć, što takim čynam vykazali pratest suprać represij, jakija zaznaje niezaležny prafsajuz.

Jak raspavioŭ ekskavatarščyk Leanid Dubanosaŭ,

napiaredadni śviatočnych vychadnych načalstva ahitavała rabočych vyjści na pracu, bo pradpryjemstva ŭžo čaćviorty miesiac nie vykonvaje płan:

«Admovilisia, nie zachacieli iści pracavać na śviata. Pa-pieršaje, i śviata takoje, što treba i na mohiłki schadzić… To pačali ŭprošvać, pačali jeździć aŭtobusam pa ekskavatarach, na kožny ekskavatar. Karaciej, cełaj delehacyjaj…»

Ekskavatarščyk kaža, što ludzi admovilisia pracavać navat za apłatu ŭ čatyry razy bolšuju, bo nie daviarajuć kiraŭnictvu:

Kali pačaŭ Haŭryłkovič pravić, jon pačaŭ svajo praŭleńnie z represij. Čaćviorty miesiac płanu niama, a jany biehajuć tolki, ludziej zmušajuć viarnucca ŭ prafsajuz. Ja kažu: daj narmalny ludziam zarobak, jany namioty la tych ekskavataraŭ pastaviać, kab, nie daj Boh, nie spaźnicca. I kab možna było navat lišniuju chvilinu papracavać. A tak u nas vychodzić, što pracujuć ludzi, biaruć vodpusk i jeduć u Rasieju — nie adpačyć z žonkaj ci dziećmi, a jeduć u Rasieju na zarobki…»

Sakratar niezaležnaha prafsajuzu na «Hranicie» Anatol Litvinka ličyć načalstva vinavatym u nievykanańni planu:

«Pryjaždžaŭ namieśnik prem'jer-ministra. Jany kryšku, ja tak zrazumieŭ, dali nie tyja ličby namieśniku prem'jer-ministra. I jany raźličvali na toje, što ŭdasca im padciahnuć hetyja vytvorčyja pakazčyki, płan, za košt pracy ŭ śviatočnyja dni. Kali ludzi nie vyjšli, to atrymlivajecca, što jany nie zmohuć dalej statystyku skažać».

Kiraŭnik supołki BNP na «Hranicie» Aleh Stachajevič kaža, što admova rabočych zadavolić prośbu načalstva — zakanamierny adkaz na cisk:

«Kiraŭnictva pakazała siabie niekampietentnym, nie ŭmiejučym raźviazvać takija situacyi. Rabočyja — heta ruchavik vytvorčaści. Kali ty da ruchavika stavišsia drenna, niesvoječasova mianiaješ masła, filtry, jon tabie jak adkaža? Złamajecca ŭ toj momant, kali ty hetaha nie čakaješ».

Naprykancy 2011 hoda niekalki socień pracaŭnikoŭ pradpryjemstva pa zdabyčy budaŭničaha kamieniu «Hranit» u Mikaševičach napisali zajavy, što vychodziać z aficyjnaha prafsajuza. Rabočyja abviaścili, što stvarajuć na pradpryjemstvie supołki Biełaruskaha niezaležnaha prafsajuza. Adrazu ž siabry niezaležnaha prafsajuza adčuli na sabie cisk z boku administracyi.

• 0
• 0
• 0
• 0
• 0
• 0
• 0
• 0