Namieśnik hienieralnaha dyrektara pa suviaziach z hramadskaściu AAT Alena Babkina paviedamiła, što AAT «Savuškin pradukt» pravodzić rebrendynh pradukcyi dla pastavak na ŭnutrany i zamiežny rynki.
Užo ŭ druhoj pałovie lipienia ŭ handlovuju sietku pačnie pastupać pradukcyja ŭ pačkach z novym dyzajnam i novym łahatypam.
«Udaskanaleny dyzajnierami elemient „vioska“, jaki adlustroŭvaje pazicyjanavańnie brenda, raźmieścicca ŭ vierchniaj častcy upakoŭki. Za košt koleru budzie vydzielenaje najmieńnie praduktu. Roznyja tłustaści buduć adlustroŭvać roznyja pa intensiŭnaści adcieńni koleraŭ. Usio heta nakiravana na toje, kab palehčyć spažyŭcam vybar pradukcyi na palicach kram. A słohan „Zaŭsiody sa śviežaha małaka“ jašče raz padkreślić stoadsotkavuju naturalnaść prapanavanaj pradukcyi», — kaža Babkina.
Da 1 lipienia 2012 hoda kampanija «Savuškin pradukt» pastaŭlała naturalnamałočnuju pradukcyju, syry, soki i sokavyja pradukty ŭ 75 rehijonaŭ Rasii, a taksama va Ukrainu, Małdovu, Armieniju, Azierbajdžan, Uźbiekistan, Turkmienistan, Kazachstan, Abjadnanyja Arabskija Emiraty i Ijardaniju.
U krainy Jeŭrasajuza — Hiermaniju, Čechiju i Łatviju — pastaŭlaŭsia tolki biarozavy sok. Akramia taho, u niekatoryja krainy dalokaha zamiežža pastaŭlaŭsia šerah najmieńniaŭ suchoj małočnaj pradukcyi.
Udzielnaja vaha ekspartu ŭ ahulnym abjomie vytvorčaści AAT pa vynikach pieršaha paŭhodździa 2012 skłała kala 50%.
18 červienia pastajanny kamitet Jeŭrasajuza pa charčovym łancuhu i zdaroŭi žyvioł dazvoliŭ z 1 lipienia pastaŭki syroha małaka i małočnych praduktaŭ ź Biełarusi na rynak ES čatyrom biełaruskim kampanijam, u tym liku AAT «Savuškin pradukt».
Miž tym, niekalki tydniaŭ tamu drukavany orhan Jeŭrasajuza — vydańnie EUobserver — paviedamlaŭ, što ŭładalnika AAT «Savuškin pradukt», bresckaha biznesoŭca Alaksandra Mošanskaha, mohuć zakranuć sankcyi ES. Mošanski, adznačaŭ EUobserver, «adyhraŭ važnuju rolu ŭ kampanii Alaksandra Łukašenki na prezidenckich vybarach 2010 hoda», biznesoviec byŭ jaho davieranaj asobaj, a taksama «staŭ trecim pa ŭpłyvovaści aliharcham u Biełarusi paśla Piefcijeva i Čyža».
Kamientary