List Łukašenku: praz vałakitu 120 siemjaŭ nie pačujuć vaš navahodni zvarot u novych kvaterach
Ministerstva architektury zajaŭlaje, što budaŭničaja halina na ŭzdymie, a damy, jakija płanavali zdać u 2013-m, pasprabujuć uvieści ŭ stroj navat raniej.
Usim by taki aptymizm! Na žal, u stalicy chapaje kanfliktnych budoŭlaŭ, jakija praktyčna zamarožanyja. U rospačy ludzi prosiać ab dapamozie kiraŭnictva krainy. Adkryty list prezidentu napisali hramadzianie z ŽBVK № 853 (vuł. Vałhahradskaja).
«Vymušanyja ŭ čarhovy raz źviarnucca da Vas pa sadziejničańnie ŭ vyrašeńni prablem z budaŭnictvam našaha šmatkvaternaha žyłoha doma, jaki nie adnosicca da katehoryi padvyšanaj kamfortnaści, pa vulicy Vałhahradskaj, 25a, h. Minsk, — skazana ŭ liście. — ŽBVK № 853 byŭ stvorany jašče ŭ vieraśni 2010 hoda administracyjaj Pieršamajskaha rajona h. Minska z metaj palapšeńnia žyllovych umovaŭ hramadzian, jakija majuć u hetym patrebu, u administracyi Pieršamajskaha rajona h. Minska i rabotnikaŭ biudžetnych arhanizacyj rajona. Amal usie kvatery ŭ našym domie budujucca z pryciahnieńniem ilhotnych kredytaŭ AAT „ASB „Biełarusbank““. Ličym hety aśpiekt niemałavažnym, bo heta pierš za ŭsio dziaržaŭnyja srodki, pry dapamozie jakich dziaržava dapamahaje tym, chto maje najbolšuju patrebu ŭ vyrašeńni žyllovaj prablemy, na praktycy demanstrujučy sacyjalnuju nakiravanaść u adpaviednaści z zajavami najvyšejšaha kiraŭnictva krainy».
Na budoŭli źmianiłasia niekalki padradčykaŭ, niekatoryja ź ich, paviedamlajuć hramadzianie, nie adpracavali avansy. U pryvatnaści, ZAT «Topzapelektra». Sa słovaŭ ludziej, da pačatku druhoha paŭhodździa 2012 im paviedamili, što košt kvadratnaha mietra ŭzros z 2,744 młn da 6,122 młn rub. Termin zakančeńnia budaŭnictva z 4 kvartała 2011 hoda pieranieśli na sakavik
— Bolš za 120 siemjaŭ nie zmohuć pačuć navahodniaje pasłańnie kiraŭnictva krainy ŭ novych kvaterach u hetym hodzie! — pišuć ludzi.
Pa stanie na žniŭnia 2012 pracent hatoŭnaści doma składaŭ usiaho 5–6%. Nie dapamahło navat umiašańnie Kamiteta dziaržaŭnaha kantrolu.
— Ź pieraličanych 2500 000 000 biełaruskich rubloŭ hienieralnym padradčykam KUP «Zavod efiektyŭnych pramysłovych kanstrukcyj» asvojena tolki kala 300 młn. Na budoŭli prysutničaje nie bolš za 7 čałaviek. Jak zapeŭnivajuć pradstaŭniki KUP «UKB Pieršamajskaha rajona h. Minska», pryčynaj takich pavolnych terminaŭ budaŭnictva jość niemahčymaść zabiaśpiečyć svoječasovuju i bieśpierabojnuju pastaŭku budaŭničych materyjałaŭ, niahledziačy na toj fakt, što hrafik pastaŭki budaŭničych materyjałaŭ uzhodnieny Minskim haradskim vykanaŭčym kamitetam. Razam z hetym nas zapeŭnivajuć u nieabchodnaści ŭstalavańnia druhoha viežavaha krana, što, biezumoŭna, pavialičyć košt kvadratnaha mietra. Adnak pry niemahčymaści zabiaśpiečyć bieśpierabojnuju pastaŭku budmateryjałaŭ hetaje dziejańnie pryviadzie da prastoju dvuch viežavych kranaŭ i budzie tolki sposabam asvoić choć by častku pieraličanych na budaŭnictva hrašovych srodkaŭ, pavialičvajučy košt budaŭnictva doma.
Łukašenku (a taksama Makieja, Kalinina i inšych) hramadzianie prosiać pryniać miery pa paskareńni tempaŭ budaŭnictva i ŭziać dom pad asabisty kantrol.
Kamientary