Ci sapraŭdy Łukašenka moža pajści šlacham Cita?

"Łukašenka pajšoŭ šlacham Cita", — śćviardžaje ŭ siońniašnim numary maskoŭskaja hazeta "Vriemia novostiej". Takaja vysnova robicca ŭ źviazku ź vizytami biełaruskaha kiraŭnika ŭ Aman dy Indyju.

U artykule vykazvajecca dumka, što Ruch niedałučeńnia (RN) — "vydatnaja strachavaja karta, jakoj navažany skarystacca Łukašenka, zaniepakojeny skaračeńniem padtrymki z boku Rasiei". Maŭlaŭ, niekali padobnym čynam, pretendujučy na adnaho ź lideraŭ hlabalnaje siły, kiraŭnik sacyjalistyčnaj Juhasłavii ratavaŭsia ad zamachaŭ Kramla na jahony palityčny los.

Ale paraŭnańnie kulhaje, ličyć palitolah Andrej Fiodaraŭ. Pa-pieršaje, adznačaje moj surazmoŭca, kiraŭnictva SFRIU i hieapalityčna, i ekanamična, i stratehična nie zaležała ad Rasiei nastolki, jak heta maje miesca ŭ vypadku Biełarusi. Pa-druhoje, što da siońniašniaha stanu RN, dyk marna namahacca ŭlić maładoje vino ŭ staryja miachi. Heta marhinalnaje, raznamasnaje ŭtvareńnie, asudžanaje na nieefektyŭnaść u sučasnym śviecie. Demakratyčnaja Indyja, na dumku Fiodarava, zastajecca ŭ RN ci nie najpierš praz pavahu da pamiaci svajho vialikaha suajčyńnika Neru, što stajaŭ la vytokaŭ idealohii niedałučeńnia.

Biełaruskaje ž kiraŭnictva razhladaje RN chutčej jak dadatkovuju mahčymaść "vychadu ŭ śviet". Aktyŭnaść pa hetaj linii možna pijaryć jak śviedčańnie nasyčanych mižnarodnych kantaktaŭ aficyjnaha Miensku.

Padumaješ, nie biaruć u niejkuju Radu Eŭropy, dzie sorak ź niečym krainaŭ! U našym Ruchu vuń až 116!

Pavialičyć

Kaniešnie, i šaniec stvaryć na platformie Ruchu niejki bolš-mienš dziejsny chaŭrus adnadumcaŭ taksama trymajecca ŭ hałavie. Adnak bolej imaviernyja, jak bačym, raptoŭnyja dvuchbakovyja aljansy. Tak znajšli adzin adnaho Łukašenka i Čaves.

Nu a Broz Cita — hieroj inšaj epochi i, badaj, trochi inšaha składu. Darečy, małaviadomy epizod: padčas pieršaj suśvietnaj vajny ŭzvod aŭstra-vuhorskaj armii pad kamandavańniem Josipa Broza (Cita — heta paźniejšy pseŭdanim) pakłaŭ bahata rasiejskich žaŭnieraŭ. Hałoŭnaje ž, adnak, u tym, što na čale SFRIU Cita dystancyjavaŭsia ad Kramla jak moh. Jon sapraŭdy chacieŭ być pa-za blokami binarnaha na toj čas śvietu.

Ciapierašniaja ž biełaruskaja ŭłada, vyhladaje na toje, nia stolki ekanamična, kolki mentalna prykavanaja da Maskvy, jak da halery. I, u pryvatnaści, achvotna prapanuje svaje pasłuhi dziela asymetryčnych adkazaŭ nachabnym janki :)

• 0
• 0
• 0
• 0
• 0
• 0
• 0
• 0