Pošta
Leta ŭ Połacku
Hetym letam, jak zvyčajna, ja baŭlu svoj vakacyjny čas u Połacku. Jak Vy mo viedajecie, «NN» tudy traplaje tolki pa padpiscy. Ale heta daloka nia ŭsio, čaho nie staje ŭ hetym nievialikim, ale hustanasielenym horadzie. Niama tut taksama j jakasnaj pitnoj vady. Tyja, chto ličyć mienskuju vadu «z-pad kranu» niasmačnaj, lepš chaj nikoli nie naviedvajuć Połacku. Jašče patruciacca. Vada ŭ Połacku maje admietny rudy koler, a ŭjaŭleńnie ab jaje smaku vy atrymajecie, kali krychu pasmokčacie iržavy ćvik. Impartnyja filtry dla vady mohuć pratrymacca na hetaj vadzie nia bolej za 3 dni. Rudy koler myjek, vannych dy prybiralnikaŭ trymajecca asabliva mocna. Nie pieramahajuć jaho nijakija reklamnyja «Comet» dy «Ace». Žychary Połacku, što ŭvieś čas karystajuccca hetkaj vadoj, mohuć ličycca sapraŭdnymi «žaleznymi ludźmi». U połackaj vadzie jość amal usia tablica Miendzialejeva. A ŭtrymańnie žaleza ŭ hetaj vadzie pieravyšaje normy ŭ dziasiatki razoŭ. Tyja pałačanie, jakija majuć ułasnaje aŭto, biaruć bikłahi dy jeduć u pryharadnyja vioski da kałodziežaŭ. Tam vada smačniejšaja. A astatnija zdaŭna zvyklisia z patajemnymi hrafikami adklučeńnia vady. Heta kali haračaj nie byvaje miesiacami, u lepšym vypadku. Horš — kali niama nijakaj, a pasiarod dvaroŭ — «archiealahičnyja» raskopy. Pra avaryi na vadapravodach lepš nie kazać. I tak usio zrazumieła.
A na pačatku žniŭnia ŭ horad prybyła humanitarnaja dapamoha ź Niamieččyny. Z horada-pabracima Frydrychshafena prybyli da pałačanaŭ alej dy čakaladki. Pa butelcy aleju atrymaŭ kožny pałačanin, a voś čakalad miascovaja ŭłada ścipła pakinuła sabie. Kažuć, uvosień buduć davać dzieciam u škołach dy sadkach. A moža, sami źjaduć? Karysna dla razumovaj pracy. Nu, chaj jaduć. Moža, razumniejšymi zrobiacca.
Viktoryja Kufcina, Miensk
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki2
Kamientary