Amerykanskija biełarusy — za Biełaruś

Amerykanskija biełarusy — za Biełaruś

U Kliŭlendzie prajšła 24-ja sustreča Biełarusaŭ Paŭnočnaj Ameryki. 3 vieraśnia tam pryniali Rezalucyju nastupnaha źmiestu:

«DZIELA TAHO, ŠTO amerykancy j kanadcy biełaruskaha pachodžańnia vielmi ŭsturbavanyja stanam spravaŭ u Biełarusi, krainie ichnaha pachodžańnia, i žadajuć spryčynicca da postupu demakratyi, niezaležnaści j dabrabytu biełaruskaha narodu; i

DZIELA TAHO, ŠTO palityčnaje j ekanamičnaje pałažeńnie ŭ Biełarusi stajecca apošnimi hadami ŭsio horšym z pryčyny hruba niedemakratyčnaj palityki ciapierašniaha (užo nielehitymnaha) prezydenta Alaksandra Łukašenki; i

DZIELA TAHO, ŠTO Łukašenkaŭ dyktatarski režym parušaje kanstytucyjnyja asnovy krainy dy padkopvaje suverenitet Respubliki Biełarusi praz šerah pahadnieńniaŭ z Maskvoj, kab hetym zadavolnić Łukašenkava asabistaje imknieńnie da viadučaj roli na šyrejšaj rasiejska-biełaruskaj palityčnaj arenie; i

DZIELA TAHO, ŠTO ŭ Biełarusi źnikajuć viedamyja lidery apazycyi (niekatoryja ź ich, jak miarkujecca, byli zabityja z udziełam uradavych dziejnikaŭ), tysiačami naličvajucca vypadki biespadstaŭnych aryštaŭ i pabojaŭ dziejačoŭ niaŭradavych arhanizacyjaŭ i prafsajuzaŭ, bieźlič pakaznych sudovych pracesaŭ i źniavolvańnia pradstaŭnikoŭ apazycyi dy nieźličonyja vypadki hvałtavańnia pravoŭ čałavieka; i

DZIELA TAHO, ŠTO łukašenkaŭski ŭrad, u jakim rasiejcy zajmajuć viadučyja stanoviščy, systematyčna pravodzić palityku rusyfikacyi metadam vyklučnaha ŭžyvańnia rasiejskaj movy ŭ aficyjnych ustanovach i dyskryminacyi biełaruskaj nacyjanalnaj kultury, biełaruskamoŭnaj adukacyi dy srodkaŭ masavaj infarmacyi; i

DZIELA TAHO, ŠTO pasiarednictva mižnarodnych ustanovaŭ (takich jak, ABSE, Rada Eŭropy, Parlamenckaja Asambleja Eŭropy) na karyść demakratyi, pravaparadku j spraviadlivaści nie prynieśli značnych vynikaŭ (u vialikaj miery tamu, što Maskva padtrymvaje Łukašenku jak svajho hałoŭnaha pasłuhača ŭ Biełarusi);

DZIELA TAHO my, udzielniki 24-j Sustrečy Biełarusaŭ Paŭnočnaj Ameryki, adnadušna pastanaŭlajem:

PRACIAHVAĆ baranić prava biełaruskaha narodu na demakratyju j niezaležnaść Biełarusi;

VYKRYVAĆ praŭdzivy tvar łukašenkaŭskaha režymu jak dyktatury, što pahražaje biaśpiecy Zachodniaj Eŭropy j demakratyjam paŭnočna-atlantyckaj siamji dziaržavaŭ praz vykonvańnie roli ahienta rasiejskaha imperyjalizmu;

PRACAVAĆ nad kansalidacyjaj demakratyčnaj apazycyi da łukašenkaŭskaha režymu jak u Biełarusi, hetak i ŭ zamiežžy;

ZAKLIKAĆ amerykanskija j kanadzkija ŭłady j dziełavyja koły macniej cisnuć na aficyjny Miensk, kab jon spyniŭ pieraśled abaroncaŭ demakratyi j nacyjanalnaj kultury ŭ Biełarusi, a taksama kulturaŭ nacyjanalnych i relihijnych mianšyniaŭ, dy pavažaŭ prava krainy na niezaležnaść;

VYKAZAĆ UDZIAČNAŚĆ Kanhresu Złučanych Štataŭ za pryniaćcie Rezalucyi 304, jakaja asudžaje palityčnyja represii ŭ Biełarusi dy zaklikaje ŭrad ZŠA dziejničać u dačynieńni da Miensku j Maskvy na karyść demakratyi ŭ Biełarusi j zachavańnia jejnaha suverenitetu j niezaležnaści;

PADZIAKAVAĆ ASABISTA kanhresmenam Semu Hejdansanu, Krystaforu Śmitu j Bendžaminu Hilmanu dy senataram Džesi Hełmsu, Benu Kampbełu j Ryčardu Derbinu, a taksama spsp. Haraldu Kou, Rosu Ŭilsanu j Džonu Armstronhu ź Dziaržaŭnaha Departamentu dy mnohim inšym aficyjnym asobam uva ŭradzie Złučanych Štataŭ i Kanhresie za ichny vydatny ŭkład u spravu abarony demakratyi ŭ Biełarusi dy niezaležnaści krainy».