Zabudź svajo imia
Niadaŭna ŭ infarmacyjnych paviedamleńniach pramilhnuła małazaŭvažnaja źviestka pra źniknieńnie aŭtamabila, što naležaŭ prahramie BT “Zona Ch”. Jak vynikaje, historyja ź jahonym źniknieńniem atrymała svojeasablivy praciah. 10 lutaha ŭ 16.40 milicyja na aŭtamabilnym rynku ŭ Ždanovičach aryštavała Alaksandra Čyhira, Vasila Bykava i ich siabra Siarhieja Kaladu pa padazreńni ŭ prodažy skradzienych aŭtadetalaŭ. Pavodle słovaŭ śledčych, u haražy Alaksandra adšukali mikraaŭtobus “Ford”, što naležaŭ teleprahramie. Hučnyja proźviščy adrazu pryciahnuli da siabie ŭvahu.
Stojačy na hanku Maskoŭskaha RAUSu, Julija Čyhir źviarnułasia da žurnalistaŭ, kažučy pra toje, što heta čysta palityčnaja sprava, u jakuju ŭłady ŭmiašali svajakoŭ viadomych u Biełarusi ludziej – syna patencyjnaha kandydata ŭ prezydenty Michała Čyhira dy plamieńnika Vasila Bykava, vymušanaha emihranta. Poruč ź jej stajała Nasta Bykava, žonka aryštavanaha, sa svaim ajčymam. Niečakana praz kolki dzion advakatka Bykava spn.Tarasiuk abvieściła, što jejny padabaronny nia maje nijakaha dačynieńnia da spravy z vykradańniem aŭtamabilaŭ i, bolš za toje, nie źjaŭlajecca svajakom piśmieńnika Vasila Bykava. My źviarnulisia da spadaryni Čyhir z prośbaju patłumačyć sytuacyju.
Pavodle słovaŭ Julii Čyhir, jana znachodzicca nia ŭ mienšaj razhublenaści, čym usie astatnija. Kali jana nia mieła racyi, pryludna kažučy pra svajactva Bykava, dyk čamu jahonyja rodnyja – taja ž Nasta – nie spynili jaje? Spn.Čyhir kaža, što raniej usie ŭ ichnaj siamji byli peŭnyja: Vasil – plamieńnik znanaha biełaruskaha piśmieńnika.
Upieršyniu Vasil źjaviŭsia ŭ siamji Čyhiroŭ kala 8 miesiacaŭ tamu. Taćciana, žonka Alaksandra Čyhira, adnaho z zatrymanych, sa škoły siabravała z Nastaj. Svajactva Bykava było niečym absalutna zvykłym i naturalnym, nie vyklikała sumnievu. Darečy, čaściej pra hety fakt kazała mienavita Nasta, a nia sam Vasil.
Čyhiry nie razmaŭlajuć z Bykavymi pra toje, što adbyłosia. Adzinaje, što skazali Naście, kab taja parazmaŭlała z advakatkaju dy patłumačyła joj, što abaraniacca treba ŭsim razam, a nia kožnamu paasobku. Nasta admoŭčvajecca. Pavodle słovaŭ spn.Čyhirovaj, Vasil – vielmi dobry chłopiec, pryjemny, adukavany j vietlivy. Jana razumieje składanaść sytuacyi i nia choča, kab dzieci pierasvarylisia, nie žadaje naškodzić Vasilu. Tamu, vidać, jana ŭstrymlivajecca ad niejkich versijaŭ, zdolnych patłumačyć taki pavarot padziejaŭ.
Vyhladaje na toje, što spn.Tarasiuk zrabiła takuju zajavu, kab dapamahčy svajmu klijentu. Dapamoha akazałasia nadziva dziejsnaju – 15 lutaha Vasil Bykaŭ viarnuŭsia dadomu.
Što Bykava ličyli svajakom biełaruskaha klasyka ŭžo daŭno — fakt. Takim čynam, versija pra plotku, admysłova puščanuju ŭ medyi pad hety dzień, adpadaje.
Julija Čyhir skazała, što ŭ toj čas, kali Michał byŭ premjeram, jany ŭvieś čas daviedvalisia pra niejkich svajakoŭ z tym samym proźviščam. Takoje niaredka zdarajecca, kali čałaviek viadomy. Moža, Vasil žadaŭ niejak padniać svoj hramadzki status, kažučy pra svajactva. Pryčym Vasil, mahčyma, vydavaŭ siabie za svajaka piśmieńnika vielmi daŭno, nastolki daŭno, što j sam zvyksia z dumkaj, što jon maje dačynieńnie da Bykava. I, najchutčej, ni Vasil, ni Nasta paprostu nikoli nie zadumvalisia, čyim imiem jany spekulujuć.
Tak čaściakom zdarajecca – luby Dastajeŭski budzie ličyć siabie svajakom klasyka, niachaj navat jahonyja prodki zusim nie z Dastojeva. Takoje “svajactva” palahčaje samaśćviardžeńnie. Vidać, heta jano nie ŭ apošniuju čarhu dapamahło Vasilu zrabicca svaim u siamji byłoha premjer-ministra dy ŭ dadatak zrabiła šmatkroć hučniejšym hetaje raźbiralnictva. Vidać, u Bykava pytalisia jašče ŭ škole: “Vasia, a ty nie svajak..?” Čamu jon upieršyniu adkazaŭ “tak”? Ci jakaja siamiejnaja lehienda była, ci prosta dumałasia, što ŭsie Bykavy – rodnyja, ale stanoŭčy adkaz, biezumoŭna, nia raz dapamahaŭ jamu vychodzić sa składanych sytuacyj.
Čyhiroŭ ciapier pastavili ŭ niajomkaje stanovišča – voś vy, maŭlaŭ, palityčnuju spravu raździmajecie, kažacie, što Bykaŭ – kreŭny palitemihrantu, pył u vočy puskajecie. A vaš syn… i h.d. Jość i zusim brudnaja versija tłumačeńnia karanioŭ hetaha “pseŭdasvajactva”. Heta mahła być šmatchadovaja pravakacyja ŭładaŭ. Na karyść hetkaje versii havoryć toj fakt, što najchutčej upiknuŭ žurnalistaŭ za toje, što jany “ŭ tannym ekstazie źniavažyli Vasila Ŭładzimieraviča Bykava”, sam Zamiatalin, hrasmajstar brudnych pravakacyjaŭ.
Kudr.
“NN” taksama dapuściła prykruju pamyłku, padaŭšy ŭ papiarednim numary niepravieranuju infarmacyju infarmacyjnaha ahienctva pra toje, što aryštavany Vasil Bykaŭ – plamieńnik piśmieńnika. Prosim daravać nam.
Kamientary