Siem hod adzinoty
U minułym sakaviku “šmatvektarnaja” zamiežnaja palityka Łukašenki vyjaviłasia ŭ cikavych napramkach.
Adrynuty eŭraatlantyčnaj supolnaściu, jon praciahvaŭ šukać dyjalohu z krainami-izhojami, abvinavačanymi ŭ dziaržaŭnym teraryźmie. Miensk naviedali ministry abarony j pramysłovaści z Tehieranu i Bahdadu. Jašče niadaŭna Irak ź Iranam vioŭ biezvynikovuju kryvavuju vajnu. Siońnia ich łučyć antyamerykanizm na dziaržaŭnym uzroŭni. Jany napchanyja savieckaj zbrojaj, jakuju varta abnavić. Dla hetaha im i treba Biełaruś, dzie zachavalisia niekatoryja cikavyja technalohii vajskovaha pryznačeńnia.
Daty pryjezdu blizkaŭschodnich haściej byli zasakrečanyja da apošniaha momantu. Vidać, kab nie stvarać ažyjatažu.
Byli spadziavańni, što atrymajecca zamanić u hości prezydenta Iranu, Machamada Chatami, adnak, jon viartaŭsia z Maskvy, dzie byŭ z aficyjnym vizytam, praz Kazań, a nie praź Miensk. Zamiest jaho prylacieŭ iranski ministar abarony. Tak atrymałasia, što Łukašenka byŭ zaniaty niečym inšym i nie adrazu pryniaŭ hościa. I toj byŭ vymušany kolki hadzinaŭ ahladać cikavostki biełaruskaj stalicy, što, jasnaja sprava, paŭpłyvała na peŭnyja punkty prahramy jahonaha rabočaha vizytu. Asnoŭnaja častka hutarki prajšła pry začynienych dźviarach. Vidać, ministar abarony Iranu paviedamiŭ svaim biełaruskim surazmoŭcam, što pradukcyja ich VPK źviazvajecca z rasiejskimi sumiežnikami. Isnuje vostraja nieabchodnaść u pastaŭkach pradukcyi dvajnoha pryznačeńnia, źviazanaj z realizacyjaj rakietnaj prahramy Iranu. Nie žadajučy ŭskładniać i biez taho prachałodnyja adnosiny z ZŠA, Rasieja najbolš ryzykoŭnyja pastaŭki pieradavieryć svajmu biełaruskamu stratehičnamu chaŭruśniku.
A voś “supracoŭnictva ŭ industryjalnaj sfery” abmiarkoŭvałasia ŭ časie rabočaha vizytu ministra pramysłovaści i pryrodnych vykapniaŭ Iraku Adnana Abdel Madžyd Džasema. Pavodle aficyjnych źviestak, abjom uzajemnaha handlu musić sioleta pavialičycca z 8 da 35 młn. dalaraŭ. Biełaruś ekspartavała ŭ Irak traktary, pryčepy, a taksama zapčastki j abstalavańnie da ich. Padčas hutarki ź irackim hościem Jarmošyn narakaŭ na sankcyi AAN suprać Iraku, jakich Biełaruś vymušanaja trymacca. Vizyt supaŭ sa źjaŭleńniem infarmacyi, što administracyja Buša schilnaja skasavać niekatoryja ekanamičnyja sankcyi suprać Iraku, zasiarodziŭšy ŭvahu na samim Sadamie Chusejnie, jahonym najbližejšym atačeńni i patencyjale vytvorčaści zbroi masavaha źniščeńnia. Amerykancy majuć namier uziać pad kantrol pradukcyju dvajnoha pryznačeńnia. Nie zastaniecca biez uvahi i pradukcyja Mienskaha zavodu kołavych ciahačoŭ, dzie na bazie adnoj madeli robiacca jak całkam mirnyja ciahačy, tak i mabilnyja puskavyja rakietnyja ŭstanoŭki. Biełaruskija ciahačy vielmi papularnyja ŭ rasiejskim i kitajskim vojskach. Ale ich źjaŭleńnie ŭ Iraku, paśla pahrozaŭ Chusejna vyzvalić Jerusalim, moža stvaryć Biełarusi novyja prablemy na mižnarodnaj arenie.
U časie hutarak Łukašenki ź irackim ministram Rada Biaśpieki AAN adzinahałosna pryniała rezalucyju, dzie asudžała Bahdad za admovu dać infarmacyju pra 600 źnikłych padčas irackaj ahresii kuvejtcaŭ.
Padčas svajho vizytu ŭ Miensk iracki ministar abmiarkoŭvaŭ i prajekt zborki mienskich traktaroŭ u vakolicach Bahdadu. Maŭlaŭ, bolšaja častka nasielnictva Iraku zaniataja ŭ sielskaj haspadarcy, tamu popyt na traktary pavinien być. Nieviadoma, nakolki hety prajekt uličvaje horki dośvied kolišnich hrandyjoznych planaŭ naładzić rehularnyja pastaŭki traktaroŭ u Pakistan, dzie jany tak i nia stalisia šyroka dastupnymi dla sialanaŭ.
Ale ŭ aficyjnaha Miensku ŭžo jość i ŭłasna iracki horki dośvied. Biełaruś mieła niebłahija šancy vyjhrać tender na budaŭnictva ciepłaelektrastancyi ŭ Iraku. Kantrakt aceńvaŭsia pryblizna ŭ $740 młn. Biełaruski bok pradstaŭlała AAT “Biełenerhabud”, ščylna źviazanaje z rasiejskim kapitałam. U vypadku pieramohi 60% sumy kantraktu pavinna było trapić rasiejskim padradčykam z “Elektramašekspartu”. Čakałasia, što pośpiechu pavinien byŭ sadziejničać vizyt u Bahdad asabista A.Łukašenki. Adnak tender vyjhrali kitajcy. I ŭ Bahdad pieršym čarteram ź Miensku palacieŭ Zamiatalin, jakoha zaŭsiody prymaje Chusejn. Pra što jany tam udvoch hutarać, vidać, navat Ałłah nia viedaje…
Nia vyklučana, što Chusejn vyrašyŭ kampensavać mienskim siabram parazu. Tak užo supała, što paśla viartańnia Zamiatalina z Bahdadu Łukašenka raptam pabłažliva zajaviŭ, što kali Rasiei ciažka dać abiacany 100-miljonny kredyt, dyk i nia treba. Potym hałoŭny bankir Piatro Prakapovič uziaŭ i pavialičyŭ valutnyja arudy Nacbanku na 100 miljonaŭ. Dziŭnaja źjava — biełaruski ekspart skaračajecca, a valutnyja rezervy pavialičylisia. Mo Zamiatalin niešta hatoŭkaju pryvioz z Bahdadu?
Raman Jakaŭleŭski
Kamientary