Na tydni

Na tydni

Pamiarkoŭnaść padbivaje

Novaj sacyjał-demakratyčnaj partyi moža nia być

Biełaruskaja sacyjał-demakratyčnaja hramada, partyja žančyn “Nadzieja” i niezarehistravanaja Biełaruskaja sacyjał-demakratyčnaja partyja Alaksieja Karala musili całkam abjadnacca da kanca žniŭnia. Adnak niadaŭniaje rašeńnie Centralnaj Rady BSDH moža pastavić kryž na hetym prajekcie. Hramada prapanuje Karalu i Palevikovaj: “Ulivajciesia ŭ nas!” Zrazumieła, što apošnija taki varyjant “intehracyi” ŭsprymuć nieadnaznačna.

Staršynia BSDH Stanisłaŭ Šuškievič na pasiedžańni Centralnaj rady 26 lipienia musiŭ šukać kampramis: u šerahach partyi jość praciŭniki “intehracyi”, jakija mahli pakinuć BSDH u znak pratestu. A hublać adzinstva partyi, navat dziela takoha abjadnańnia, nia chočacca…

“Usio rabiłasia dla taho, kab hetaha abjadnańnia nie adbyłosia, — kaža adzin z udzielnikaŭ narady. — U našaj partyi hałoŭnaje — nacyjanalnyja pytańni, a ŭ ich — sacyjalistyčnyja i navat marksisckija. Tamu, kali chto ź ich žadaje, chaj pišuć zajavy ŭ našu partyju”. Kab na źjeździe BSDH ludzi Karala i Palevikovaj mieli adnolkavyja mahčymaści balatavacca ŭ kiroŭnyja orhany, ich musić być tam nia mieniej za tysiaču. Ale ŭ pačatku 2002 h. Alaksiej Karol nia zdoleŭ sabrać dastatkovuju kolkaść siabroŭ dla rehistracyi svajoj BSDP u Miniuście.

“Ja dumaju, što heta paśpiešlivaje rašeńnie. Šuškievič i jaho aktyŭ jašče nie praanalizavali tyja abstaviny, u jakich jany znachodziacca”, — kaža Valancina Palevikova. Dyj navošta, u takim razie, było toje abjadnańnie raspačynać — bo inicyjataram była mienavita partyja S.Šuškieviča. V.Palevikova spadziajecca, što kiraŭnictva BSDH pierahledzić svajo rašeńnie. “Bo abjadnańnie ciapier patrebnaje ŭsim demakratyčnym siłam. Adna sprava — zmahacca adnamu, a zusim inšaja — razam”.

Cikava, što partyja žančynaŭ “Nadzieja”, rejtynhi jakoj najvyšejšyja, vystupaje za abjadnańnie. Tady jak Hramada, što abjadnoŭvaje pieravažna intelihiencyju, vahajecca. Napeŭna, pazycyja partyj tut zaležyć ad unutranaj sytuacyi ŭ partyjach. Niaŭpeŭnienaść adčuvajuć tyja palityčnyja hrupoŭki, jakija ŭ vypadku pierarehistracyi ci pravierki nie zmahli b sabrać patrebnaj dla praciahu dziejnaści kolkaści čalcoŭ.

Aleh Tačony

Zajava polskaha Sojmu

“Isnavańnie ŭ Biełarusi niedemakratyčnych strukturaŭ ułady my ŭsprymajem jak pahrozu dla miru i stabilnaści ŭ Centralnaj i Ŭschodniaj Eŭropie”, — hetak napisała ŭ svajoj zajavie Kamisija pa mižnarodnych spravach polskaha Sojmu.

Zajava była inicyjavanaja pradstaŭnikami polskich pravych partyjaŭ “Zakon i spraviadlivaść” dy “Hramadzianskaja platforma”. Lider “Zakonu i spraviadlivaści” były hienprakuror Polščy Lech Kačyński (jahony baćka pierad vajnoj skončyŭ škołu ŭ Baranavičach) kaža, što padziei ŭ Biełarusi turbujuć palakaŭ značna bolš, čym toje, što dziejecca, prykładam, u Paŭdniovaj Eŭropie.

“Polskaja dyplamatyja pavinna padtrymlivać namahańni mižnarodnaj supolnaści, skiravanyja na viartańnie demakratyčnaha ładu, a taksama pašany da pravoŭ čałavieka ŭ Biełarusi. My pavinny vystupać suprać represijaŭ u adnosinach da apazycyi, hramadzkich arhanizacyjaŭ i niezaležnych medyjaŭ. Asablivaje značeńnie maje vyśviatleńnie losu źnikłych palitykaŭ, a taksama faktaŭ, jakija śviedčać ab tym, što hety arhanizavany hvałt robicca z dapamohaj albo sa zhody ŭładaŭ. My prahniem, kab paśla vykanańnia našych patrabavańniaŭ Biełaruś viarnułasia na mižnarodnuju arenu ŭ jakaści siabra takich mižnarodnych strukturaŭ, jak Rada Eŭropy, ABSE i Suśvietnaja handlovaja arhanizacyja”, — havorycca ŭ zajavie.

Razam z tym, Kamisija ličyć, što treba pašyrać haspadarčaje, navukovaje i kulturnaje supracoŭnictva ź Biełarusiaj, a taksama kantakty ź miascovymi orhanami samakiravańnia, jakija “ŭ budučym pavinny być fundamentam dobrych miždziaržaŭnych stasunkaŭ”.

Zajava, jakuju Sojm pryniaŭ adnahałosna, jość dakumentam, jaki abaviazkova musić brać pad uvahu polskaje MZS, budujučy stasunki ź Biełarusiaj.

Alaksiej Dzikavicki, Varšava

doktarka tydnia

Ministar Pastajałka

Alaksandar Łukašenka pryznačyŭ Ludmiłu Pastajałku ministram achovy zdaroŭja. Sama jana ź Bieraścia. Cpn. Pastajałka — maci asabistaje doktarki A.Łukašenki. Z kastryčnika jana zajmała pasadu pieršaha namieśnika ministra achovy zdaroŭja.

hłupstva tydnia

Tunel

Adzin litoviec prapanavaŭ prakapać tunel ad Kalininhradu da Biełarusi, kab uniknuć izalacyi rasiejskaha anklavu na Bałtyjskim mory paśla dałučeńnia Litvy da Šenhienskaj zony. A rasiejskija i “toža-biełaruskija” kamentatary ŭsurjoz taki varyjant abmiarkoŭvajuć. Im i ŭ hałavu nie prychodzić, što praz 20 hadoŭ tunel daviadziecca padoŭžyć kilametraŭ na 400 na ŭschod.

niečakanaść tydnia

Starykievič zastaŭsia

Prezydyjum Federacyi prafsajuzaŭ Biełaruskaj nie pryniaŭ prapanovy Leanida Kozika zvolnić Alaksandra Starykieviča z pasady hałoŭnaha redaktara hazety “Biełaruski čas”. Nie bajacca ni Kozika!

Pavodle inf. BiełaPAN, radyjo “Racyja”