Prezydent daŭ daručeńnie. Jak jano vykonvajecca?
Usienarodny pačyn
“Ludzi dobryja, prabačcie, što da vas źviartajemsia. Sami my nia miesnyja, pryjechali zdalok, vielmi lubim čytać. Achviarujcie chto kolki moža na budaŭnictva biblijateki...” Cyhanka ź dziećmi praciskajecca miž pasažyraŭ tramvaju. Dajuć mała, bo nie ŭ navinu: kampanija pa zbory srodkaŭ na novy budynak Nacyjanałki ciahniecca druhi hod. Dyj davieru da “pryvatnych” zborščykaŭ niašmat. Vychodžu na prypynak. Ścieny zaklejenyja plakatami z vyjavaj Haranta Kanstytucyi i nadpisami “A ty achviaravaŭ?”, “Dajoš biblijateku!”. Zahledzieŭšysia, ledź nie traplaju pad nohi histeryčnaj demanstracyi moładzievaha apazycyjna-ekalahičnaha ruchu, što prachodzić pad lozunhami “Nie chacim čytać!”, “Kniha — heta zabitaje dreva!”. Ale takija šeści — chutčej vyklučeńnie, čym praviła. Bolšaść hramadzianaŭ staviacca da inicyjatyvy prychilna. Jość z kaho brać prykład: sam Harant Kanstytucyi, jaki asabista kiruje budaŭnictvam biblijateki, štodnia a 6-j ranicy ŭračysta admaŭlajecca ad dzionnaha zarobku pa pieršaj prahramie nacyjanalnaha radyjo. Natchnionyja jahonym prykładam deputaty pałaty pradstaŭnikoŭ adnaho razu vyrašyli ceły dzień nia jeści, a zekanomlenyja srodki pieraličyć u fond NB. Ad svaich dzionnych zarobkaŭ dobraachvotna admaŭlajucca nastaŭniki, daktary, inžynery. A zapačatkavała hetuju tradycyju nie intelihiencyja, a kałhaśniki niekatorych haspadarak, što dobraachvotna nie atrymlivajuć zarobkaŭ ź viasny. Hrošy iduć biaskoncym patokam.
Jakaja suma treba dla biblijateki — skazać ciažka. Budaŭniki abiacali padbić babki naleta. Zrešty, kali źbiarom i krychu bolej — lišnim nia budzie. Bo patrabujecca jašče budynak dla časovaha zachoŭvańnia knižak na čas praviadzieńnia ŭ biblijatecy sezonnych sielskahaspadarčych kirmašoŭ, dziakujučy jakim NB vyjdzie na samaakupnaść. Nielha ž, kab krynicy viedaŭ lažali na vulicy pad bryzentam.
...Kali viartaŭsia ŭviečary z pracy, u ciomnym zavułku padyšli troje i spytalisia: “A ty achviaravaŭ na biblijateku?” Z radaściu addaŭ usie hrošy.
Siarhiej Mikulevič
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary