Намесніца міністра замежных спраў прыме ўдзел у міжнароднай канферэнцыі «East Forum Berlin 2013».
Беларускія дыпламаты актывізавалі кантакты з еўрапейскімі калегамі. 11 красавіка намесніца міністра замежных спраў Алена Купчына сустракалася ў Брусэлі з членам Еўрапейскай камісіі па пытаннях пашырэння ЕС і Еўрапейскай палітыкі суседства Штэфанам Фюле, 15 красавіка яна сустракалася з пасламі Нямеччыны, Літвы і часовымі паверанымі Чэхіі і Славаччыны. І вось запланаваны новы візіт у Еўропу.
17–18 красавіка 2013 у Берліне беларуская дэлегацыя на чале з намеснікам міністра замежных спраў Аленай Купчыной прыме ўдзел у міжнароднай канферэнцыі «East Forum Berlin 2013», паведамляе сайт беларускага МЗС.
На форуме абмяркуюць уплыў пазыковага крызісу ЕС на эканомікі ўсходніх краін-суседзяў Еўрасаюза, перспектывы зон свабоднага гандлю, шанцы і рызыкі, звязаныя з магчымым стварэннем агульнай эканамічнай прасторы ад Лісабона да Уладзівастока.
У мерапрыемстве прымуць удзел члены ўрадаў краін Цэнтральнай і Усходняй Еўропы, палітычнае кіраўніцтва Германіі, прадстаўнікі Еўракамісіі і топ-мэнэджмент найбуйнейшых германскіх кампаній і канцэрнаў.
Кіраўнік беларускай дэлегацыі прыме ўдзел у панэльнай дыскусіі форума на тэму «Еўрапейскі саюз, Усходняе партнёрства, Еўразійскі саюз — выклікі і магчымасці пагадненняў аб свабодным гандлі і эканамічнай гарманізацыі».
Беларуская дэлегацыя запланавала таксама шэраг сустрэч у Федэральным міністэрстве замежных спраў і Федэральным міністэрстве эканомікі і тэхналогій ФРГ, Германскім саюзе гандлёва-прамысловых палат, з дэпутатамі Бундэстага.
Канферэнцыя «East Forum Berlin 2013» арганізавана Усходнім камітэтам германскай эканомікі пры падтрымцы банка «UniCredit HypoVereinsbank». Мерапрыемства праводзіцца ўпершыню і пазіцыянуецца ў якасці дыскусійнай пляцоўкі для дыялогу палітыкаў і бізнэсменаў з Захаду і Ўсходу аб перспектывах паглыблення ўзаемнавыгаднага эканамічнага супрацоўніцтва.
Каментары