На гэтым тыдні ў Нарвегіі адбываецца апошні ў сезоне 2013/2014 этап Кубку свету па біятлоне. Першымі ў праграме спаборніцтваў значыліся спрынты.
Беларуска Дар’я Домрачава, якая правяла не надта ўдалы этап у фінскім Кантыялахці, на гэты раз аказалася ў тонусе. Домрачава выдатна ішла па дыстанцыі, на гэты раз сэрвісмены ўгадалі са шмаравідлам. У барацьбе нагамі канкурэнцыю ёй магла скласці фінка Кайса Макарайнен, лідар агульнага заліку.
Тым не менш, стральба ў Кайсы не заладзілася. Фінка на двух агнявых рубяжах пахібіла аж чатыры разы. Домрачава, на жаль, таксама не змагла перарваць серыю гонак са штрафнымі коламі. Беларуска не патрапіла ў мішэні адзін раз.
Але Домрачава усё адно змагла ўзняцца на першае месца. Нарвежка Тура Бергер заняла другое месца, саступіўшы Домрачавай 10 секунд. Трэцяя амерыканка С’юзан Данклі (33 секунды адставання) – гэта яе першы п’едэстал.
У астатніх беларусак гонка не надта задалася: Настасся Дубарэзава – 45-ая, Людміла Калінчык – 48-ая, Надзея Скардзіна – 53-ая, Настасся Каліна – 60-ая.
У суботу адбудзецца гонка праследвання, а ў нядзелю – масстарт. На дадзены момант, Домрачава займае трэцяе месца ў агульным заліку Кубка свету, саступаючы Макарайнен і Бергер.
Каментары