Заводскім (Мінска) раённым аддзелам Следчага камітэта распачата крымінальная справа ў дачыненні да 17-гадовага вучня адной са школ раёна, затрыманага паводле падазрэння ў распаўсюджванні псіхатропных рэчываў у буйным памеры.
Як паведаміў афіцыйны прадстаўнік упраўлення СК па Мінску Аляксандр Герасімаў, затрыманню папярэднічалі сумесныя следчыя і аператыўна-вышуковыя мерапрыемствы, праведзеныя супрацоўнікамі падраздзялення па наркакантролі Заводскага РУУС і Заводскага РАСК. Падлетка затрымалі з доказамі злачынства падчас закладкі ў тайнікі курыльных сумесяў, у якіх утрымліваецца псіхатропны кампанент AM(N)-2201. У яго канфіскавана 9,9 г размеркаваных па порцыях «міксаў».
У хуткім часе затрыманаму будзе выстаўлена абвінавачанне, вырашаецца пытанне аб выбранні ў дачыненні да яго меры стрымання ў выглядзе ўзяцця пад варту.
За ўчыненне злачынства, прадугледжанага ч. 3 арт. 328 КК, вызначана пакаранне ў выглядзе пазбаўлення волі на тэрмін да 13 гадоў з канфіскацыяй маёмасці.
Варта зазначыць, што, як заявіў 27 сакавіка ў размове з журналістамі намеснік старшыні Вярхоўнага суда Беларусі Валерый Калінковіч, айчыннае крымінальнае заканадаўства не дыферэнцыюе пакаранне прадаўцам наркотыкаў і гэтак званым мінёрам, якія толькі закладваюць купленыя кліентамі праз інтэрнэт дозы ў тайнікі. Ім таксама пагражае адказнасць за збыт наркотыкаў.
Паводле інфармацыі Герасімава, толькі ў Заводскім раённым аддзеле Следчага камітэта з пачатку года завершана расследаванне і накіравана ў суд больш як 40 крымінальных спраў у сферы незаконнага абароту наркотыкаў. Яшчэ прыблізна 20 крымінальных спраў знаходзяцца ў вытворчасці, з іх пяць — у дачыненні да непаўналетніх. У пераважнай большасці ў матэрыялах крымінальных спраў фігуруюць курыльныя сумесі з утрыманнем псіхатропных рэчываў.
Каментары